BOKS: Mańǵystaý men OQO - Qazaqstan Kýbogynyń fınalynda
ASTANA. 9 jeltoqsan. QazAqparat - Kókshetaý jáne Shymkent qalalarynda «Qazaqstandyq boks federatsııasynyń Kýbogy» úshin jartylaı fınaldyq kezdesýler bolyp ótti.
Aqmola oblysynyń komandasy óz alańynda 4:6 esebimen Mańǵystaýdan kelgen bylǵary qolǵap sheberlerine ese jiberdi, dep habarlaıdy «Elaman» sport agenttigi.
Alǵashqy eki jeńil salmaq dárejeleri boıynsha aqmolalyqtar jeńiske jetip, jalpy esepte alǵa shyqqan bolatyn. Birinshi bop 49 kelide sharshy alańǵa shyqqan Temirtas Júsipov qarsylasy Jánibek Esqýatovty úshinshi raýndta aıqyn jeńse, 52 kelidegi Ánýar Batyrhanov Jánibek Muratovty esep aıyrmashylyǵymen tize búktirdi. Budan keıin qonaqtar qatarynan eki kezdesýde utyp, jalpy esepti teńestirdi. Jeńiske jetkender - Muhıt Amantaev (56 keli) pen Berik Abdrahmanov (60 keli). 64 keli boıynsha tepe-teń ótken kezdesýde tóreshi jergilikti boksshy Sabyrjan Bekbergenovtyń qolyn kóterdi, Sabyrjan bul kezdesýde Jánibek Ájibaıdy jeńdi. Budan soń mańǵystaýlyqtar qatarynan úsh kezdesýde óz qarsylastarynan basym túsip, jalpy esepti 3:5-ke jetkizdi. 69 kelidegi tájirıbeli boksshy Sýleıman Berdýkaev on segizge endi tolǵan Andreı Leıhnerge esh múmkindik qaldyrmasa, apta buryn aıaqtalǵan el chempıonatynda 75 kelide aqtyq synǵa deıin jetken Erik Áljanov taǵy bir jas boksshy, sport sheberinen úmitker Dastan Sahıdy birinshi raýndta nokaýtqa jiberdi. Al 81 kelide rıng tórine kóterilgen elimizdiń maqtanyshy, London Olımpıadasynyń kúmis júldegeri Ádilbek Nııazymbetov qarsylasy Mıhaıl Gerasımovty birinshi raýndta-aq búırekten uryp, aýyr nokaýtqa jiberdi. Bul Ádilbektiń Olımpıadadan keıin sharshy alańǵa shyǵyp turǵany. Osy jeńisten keıin-aq Mańǵystaý oblysy qurama komandasynyń Kýbok jolyndaǵy fınalǵa shyqqany belgili boldy, sebebi asa aýyr salmaqta Aqmola komandasy atynan jarııalanǵan Jan Kosobýtskıı alǵashqy kezdesýlerde Qostanaı oblysy atynan shyqqan bolatyn. Bul atalmysh jarystyń Erejesine qaıshy bolǵandyqtan, jarystyń tehnıkalyq ókili mańǵystaýlyqtardyń bergen qarsylyǵyn qabyl alyp, Kosobýtskııdi jarystan shettetken edi. Sondyqtan Nııazymbetovtyń jeńisinen keıin Mańǵystaý komandasy jalpy esepti 6:3-ke jetkizip, fınalǵa beriletin joldamaǵa qol jetkizdi. Al sońǵy bolyp sharshy alańǵa kóterilgen 91 kelidegi boksshylardyń da kezdesýi ýaqytynan buryn aıaqtaldy, sebebi jergilikti boksshy Mádı Habıev mańǵystaýlyq jas boksshy Muhammet Masaqbaevty búırekten uryp qulatyp, nokaýtpen jeńiske jetti.
Al ekinshi kezdesýde Ońtústik Qazaqstan oblysynyń komandasy óz alańynda Almaty oblysynan kelgen boksshylardy qabyldap, 7:3 esebimen basym tústi. Qonaqtar tek aýyr salmaqtarda ǵana jeńiske jete aldy.
Endi 15 jeltoqsan kúni Astana qalasynda «Dáýlet» sport saraıynda Mańǵystaý jáne Ońtústik Qazaqstan oblystary kezdesetin bolady. Bul eki komanda da buǵan deıin fınalda óner kórsetken bolatyn. 2010 jyly ońtústikqazaqstandyqtar Astana qalasynyń boksshylaryna ese jiberse, byltyr Mańǵystaý komandasy 4:6 esebimen Qaraǵandy oblysynyń bylǵary qolǵap sheberlerinen tize búkken edi. Endi mine, qos komandaǵa da ekinshi múmkinshilik týyp tur. 15 jeltoqsanda jańa Kýbok ıegerin anyqtaıtyn bolamyz.
