Boks: Qyzyljardan ushqan qyran - Janat Jaqııanov
ASTANA. QazAqparat - Búgingi tańda qazaq sportshylarynyń áýesqoı bokstaǵy jetistikterine álem elderi qyzyǵa da, qyzǵana da qaraıdy. Alaıda, kásipqoı boksta el namysyn qorǵap júrgen boksshylarymyz saýsaqpen sanarlyq. Solardyń ishinde biri de, biregeıi de - Gennadıı Golovkın.
Qazaq jankúıerleri Genany óz baýyryndaı kórip ketkeli qashan?! Gena búgin qurlyqtyń arǵy betinde aıqasqa shyǵady dese, tún uıqysyn tórt bólip, sol jekpe-jekti kórýge asyqpaıtyn adamdar kemde-kem. Onyń búginge deıingi baǵyndyrǵan bıikteri men jetken jetistikterin eńbektegen baladan eńkeıgen qarııaǵa deıin jatqa biledi desek artyq aıtqanymyz emes.
Biraq, Gena kásipqoı boksta qazaq eliniń atynan shyǵyp júrgen jalǵyz boksshy emes. Onyń artynan izin basyp, ókshelep kele jatqan jas talanttar da jeterlik. Solardyń biri el nazarynda kóp bola bermeıtin, alaıda biraz bıikterdi baǵyndyryp úlgergen petropavldyq kásipqoı boksshy - Janat Jaqııanov. Biz búgin Janat týraly keńinen toqtalǵandy jón kórip otyrmyz.
Jaqııanov - ótken jyly qazaq sportshylarynyń ishindegi óz mindetin abyroımen atqarǵan sportshynyń biri dep aıtýǵa tolyq negiz bar. Sebebi, ol ótken jyly kásipqoı bokstan WBA nusqasy boıynsha jeńil salmaqtaǵy ýaqytsha álem chempıony ataǵyn jeńip aldy. Ol bul ataqqa ótken jyly Monte-Karloda ótken 12 raýndtyq jekpe-jekte qol jetkizdi. Qarsylasy WBA (Interim) tujyrymy boıynsha álem chempıony venesýelalyq Ionfres Parehon (17-1-1, 8 KO) bolatyn. Sondaı-aq, qazaqtyń kásipqoı boksshysy ótken jyly WBC tujyrymynyń jańartylǵan reıtinginde Taıland tarlanbozy Sýrııan Sor Rýngvısaıdy basyp ozyp, Búkilálemdik boks keńesi (WBC) tujyrymy boıynsha álem chempıony ataǵyna talasýdan úmitkerler arasynda birinshi orynǵa shyqty. Munyń ózi qazaq boksshysynyń kásipqoı boks álemindegi ornyn aıqyndaı tústi.
Esterińizde bolsa, ótken jyly sáýir aıynyń sońynda Janat Jaqııanov EBU tujyrymy boıynsha jeńil salmaqta (53,5 kelige deıingi) Eýropa chempıony ataǵyn da jeńip alǵan bolatyn. Osy chempıondyq ataq úshin ótken jekpe-jekte Qazaqstan boksshysy frantsýz Karım Gýerfıdi nokaýtqa túsirgen.
Aıta keteıik, ZZ laqap atymen óner kórsetip júrgen jerlesimiz jeńil salmaqta WBC Eurasia Pacific Boxing Council ataǵynyń jeńimpazy. Endi Janat bıylǵy, 2016 jylǵy alǵashqy jekpe-jegin kóktem aılarynda ótkizýdi josparlap otyr.
Janat kásipqoı boksqa 2007 jyly bet burǵan bolatyn. Sodan qazirgi ýaqytqa deıin 27 kezdesý ótkizip, 26 ret jeńiske qol jetkizdi. Onyń 18-in merziminen buryn aıaqtady. Ol ótken jyldyń 7 qarashasynda venesýelalyq Ionfrez Parehony upaı sanymen utyp, ýaqytsha álem chempıony ataǵyna qol jetkizdi.
Bul kúnderi Jaqııanov kezindegi Ulybrıtanııanyń ataqty boksshysy Rıkkı Hattonnyń qolastynda jattyǵýda. Qazirgi kezde Janat Jaqııanovtyń komandasy Ulybrıtanııanyń beldi boksshylarynyń biri, WBA nusqasynyń tolyqqandy chempıony Djeımı MakDonnelmen kelissózder júrgizýde. Bul jigittiń de júrip ótken joly jarqyn jeńisterge toly. 29 jastaǵy Djeımı 2005 jyldan beri kásipqoılarmen kúsh synasyp júr. Sol kezden beri 30 ret rıngke kóterilip, 27 ret jeńiske jetti. 12 qarsylasyn nokaýtqa jiberdi. 2 ret utylyp, taǵy 1 básekede teń esep tirkeldi. Bul kúnderi atalmysh nusqa boıynsha altyn belbeý dál osy MakDonnelge tıesili.
Janat Jaqııanov týraly jalpy maǵulmat:
Tolyq esimi: Janat Eskendiruly Jaqııanov
Laqap aty: ZZ
Azamattyǵy: Qazaqstan
Týǵan kúni: 4 qarasha 1983 (32 jas)
Týǵan jeri: Petropavl
Turǵylyqty jeri: Petropavl
Salmaǵy: Asa jeńil salmaq (53,5 keli)
Turysy: Ońqaı
Boıy: 170 sm
Qoldyń qarqyny: 170 sm
Bapkeri: Rıkkı Hatton
Komandasy: Hatton promotions
Kásibı karerasy
Alǵashqy aıqasy: 3 tamyz 2007 jyl
Sońǵy aıqasy: 7 qarasha 2015 jyl
Chempıon beldigi: EBU, WBA interim
Aıqastar sany: 26
Jeńgender sany: 25
Nokaýtpen jeńgeni: 18
Jeńilgender sany: 1
Mine, kásipqoı boksta el namysyn abyroımen qorǵap júrgen boksshylarymyzdyń biri Jaqııanov týraly tolyq málimetti nazarlaryńyzǵa usyndyq. Elimizdiń Ánuranyn sharyqtatyp, kók Týymyzdy bıikte qalyqtatyp júrgen baýyrymyzdyń alar asýy men basar belesi áli alda ekeni anyq. Qazaqtyń qaısar uldary áýesqoı boks sharshy alańdarynda ǵana álemdi moıyndatpaı, kásipqoı boks arenalarynda da abyroıymyzdy asqaqtatady degen úmittemiz.
Kúnsultan Otarbaı
