BOKS: Qyrǵyz sportshysy legıoner atandy
ASTANA. 3 jeltoqsan. QazAqparat - Qyrǵyz eliniń sportshysy Búkilálemdik boks serııasy (WSB) aıasynda legıoner retinde Ýkraına komandasynyń quramynda óner kórsetetin boldy,
dep habarlaıdy Baq.kz atalǵan uıymnyń resmı saıtyna silteme jasap.
6 jeltoqsanda Brovar qalasynda (Ýkraına) «Ýkraın atamandary» men «Argentına kondorlary» komandalary qolǵap túıistirmek. Bes salmaq boıynsha kúsh synasatyn bylǵary qolǵap sheberleriniń arasynda 52 keli salmaq dárejesinde ulty qyrǵyz Azat Úsenalıev «Atamandardyń» atynan argentınalyq Krıstıan Edýard Rodoıǵa qarsy shyqpaq dep kútilýde.
Esterińizge sala keteıik, Búkilálemdik boks serııasy - AIBA basshylarynyń jańadan 2010 jyly ashqan jobasy. Bul jobada álemniń on eki komandasy kásipqoı bokstan óz ónerlerin sarapqa salyp keledi. Komandalar 54, 61, 73, 85 jáne 91+ keliden joǵary salmaq dárejeleri boıynsha óner kórsetedi. Jekpe-jekter úsh mınýttan bes raýnd ótetin bolyp bekitilgen. Sonymen qatar, osy syndarǵa qatysatyn ár eldiń quramasynyń sapynda, kem degende, eki legıonerden bolýy shart.
Al qarasha aıynda Almatyda ótken Álem chempıonatynda aıyrqalpaqty aǵaıyndarymyzdyń ókili bizdiń jerlesimiz Іlııas Súleımenovpen qolǵap túıistirip, jeńilis tapqan bolatyn.
