Boks: Qurlyqtyq irikteý týrnırine ár salmaqtan bir sportshydan ǵana barady
«Oqý-jattyǵý jıyny óte joǵary deńgeıde ótip jatyr. Sheberlikterin shyńdaýǵa Anglııa, Germanııa, Belarýs quramalary elordamyzǵa kelip otyr. Ulttyq qurama baryn salyp, lıtsenzııalyq týrnırge tyńǵylyqty daıyndalyp jatyr. Ókinishke qaraı, aqpan aıynda bolatyn lıtsenzııalyq irikteý týrnırin keıinge shegerdi. Negizi ulttyq quramadaǵy sportshylardyń barlyǵy óte jaqsy daıyndyqta bolǵan. Naýryzǵa qaldyrylǵanymen ol bizdiń balalarǵa keri áserin tıgizbeıdi dep oılaımyn. Іrikteý týrnırine kimder baratyny belgisiz. Qazirgi tańda 69 kelide ulttyq quramada men, Abylaıhan Júsipov, Talǵat Shaıken jáne Aıatýlla Takıjanov deıtin tórt sportshy barmyz. Qurlyqtyq irikteý týrnırine ár salmaqtan tek bir sportshydan barady. Kimniń baratynyn ulttyq quramanyń bapkerleri sheshedi», - deıdi Aslanbek Shymbergenov.
Aıta keterligi, bokstan qurlyqtyq irikteý kezeńi Qytaıdyń Ýhan qalasynda 3-14 aqpan kúnderi ótýi tıis edi. Alaıda, koronavırýstyń taralýyna baılanysty adamdardyń densaýlyǵyna nuqsan keltirmeý maqsatynda jergilikti uıymdastyrý komıteti týrnırdi keıinge qaldyrǵany týraly málimdedi. Osyǵan baılanysty, qurlyqtyq irikteý týrnıri 3-11 naýryz aralyǵynda Ammanda ótetin boldy.