Boks: Kúngeıbaeva álem chempıonatynyń jartylaı fınalyna shyqty
ASTANA. QazAqparat - Aýyr salmaqta óner kórsetetin Qazaqstan quramasynyń boksshysy Lázzat Kúngeıbaeva Astanada ótip jatqan álem chempıonatynyń jartylaı fınalyna shyqty.
Álemniń vıtse-chempıony búgin Úndistan boksshysy Sıma Pýnıamen judyryqtasyp, 3:0 esebimen jeńiske jetti. Osy jeńisinen keıin Kúngeıbaeva aldyn ala álem chempıonatynyń júldesine iligip otyr.
Bunyń aldynda álem chempıonatynyń jartylaı fınalyna Qazaqstan boksshylarynyń sapynan Nazym Qyzaıbaı (48 keli), Dına Jolaman (54 keli), Aıjan Qojabekova (57 keli) men Valentına Halzova (69 keli) shyqqan bolatyn. Ókinishke oraı, 64 kelide óner kórsetetin Zarına Tsoloeva jeńilis tapty.
Eske sala keteıik, bul kúnderi Astanada áıelder arasynda ótip jatqan bokstan álem chempıonatynda Olımpıada joldamalary oınatylýda.
