Boks: QR chempıonatynyń jeńimpazdary iri jarystarda el namysyn qorǵaıdy – Baqtııar Artaev

ORAL. QazAqparat – Búgin bokstan erler arasynda Oralda bastalatyn Qazaqstan chempıonatynda jeńimpaz atanǵandar aldaǵy iri jarystarda el namysyn qorǵaıdy. Bul týraly Óńirlik kommýnıkatsııalar qyzmeti alańynda ótken brıfıngide Olımpıada chempıony, Qazaqstan boks federatsııasynyń vıtse-prezıdenti Baqtııar Artaev málim etti, dep habarlaıdy QazAqparat tilshisi.

Onyń aıtýynsha, Qazaqstan birinshiliginde bıylǵy álem chempıonatyna qatysqan boksshylar da baq synaıdy.

«Tek álem chempıondary men júldegerleri jarystan bosatyldy. Bıylǵy Qazaqstan birinshiliginde ádil qazylyq jasalyp, eń myqtylar ulttyq quramaǵa irikteletin bolady. Aldaǵy jyly aldymen 23 qańtar – 1 aqpanda Ózbekstan astanasy Tashkent qalasynda 19-23 jastaǵylar arasynda Azııa chempıonaty ótedi. Sodan keıingi iri doda – Azııa oıyndary. Sondaı-aq álem kýbogynda komandalyq saıys bolady. Álem kýbogynyń júlde qory 2 mln AQSh dollary bolady degen joramal bar. Mine, osy úsh jarysta bıylǵy chempıonatta jeńimpaz atanǵandar el namysyn qorǵaıdy», - dedi B.Artaev.

Qazaqstan boks federatsııasynyń atqarýshy dırektory Maratbek Myqtybekov Táýelsizdiktiń 30 jyldyǵyna oraı uıymdastyrylǵan el chempıonatynda 13 salmaq dárejesinde jeńimpaz-júldegerler anyqtalatynyn, birinshilikti ótkizý úshin barlyq jaǵdaıdyń jasalǵanyn jetkizdi.

«Qazaqstan chempıonatyna elimiz qalalary men oblystarynan 211 boksshy qatysyp, baq synamaqshy. Batys Qazaqstan oblysynyń namysyn bıylǵy Azııa chempıonatynyń kúmis júldegeri Danııal Sábıt bastaǵan 10 sportshy qorǵaıdy», - dedi BQO boks federatsııasynyń prezıdenti Baýyrjan Kárimov.

Eske sala keteıik, budan buryn Táýelsizdiktiń 30 jyldyǵyna oraı Oralda bokstan erler arasynda Qazaqstan chempıonaty ótetinin jazǵan bolatynbyz.