BOKS: Klıchkonyń kezekti qarsylasy amerıkalyq Brıgs bolýy yqtımal
ASTANA. QazAqparat - Vladımır Klıchkonyń menedjeri Bernd Bonte ýkraındyq boksshynyń amerıkalyq Shennon Brıgspen kezdesýi múmkin ekenin rastady, dep habarlady fightnews.com.
Bul jekpe-jek Vladımır Klıchko ózge AQSh ókili Braıant Djennıngspen kezdespegen jaǵdaıda ótedi. Eger Klıchko Brıgspen rıngke shyqsa, onda jekpe-jek Nıý-Iorkte ótýi múmkin ekendigi atap ótildi.
Halyqaralyq boks federatsııasynyń (IBF), Búkilálemdik boks qaýymdastyǵynyń (WBA) jáne Halyqaralyq boks uıymynyń (IBO) nusqasy boıynsha aýyr salmaqtaǵy álem chempıony Vladımır Klıchko osyǵan deıin IBF tıtýlyna úmitker bolgarııalyq Kýrbat Pýlevpen kezdesti. Jekpe-jek 16 qarashada, túnde Gambýrgte ótken bolatyn. Besinshi raýndta Klıchko qarsylasyn nokaýtqa túsirip, jeńiske jetti.
