Boks keshi: Qazaqstandyqtardyń qarsylastary belgili boldy
ASTANA. QazAqparat - Búgin Qanat Islam men Patrık Alloteı salmaq ólsheý rásiminde, erteń bolatyn basty boks keshiniń ózge de qatysýshylary salmaq ólshedi. Bul sharada qazaqstandyq boksshylardyń qarsylastary, sportshylardyń salmaqtary belgili boldy, dep habarlady QazAqparat tilshisi.
Qanat Islam men Patrık Alloteıdiń jekpe-jeginde qolǵa túıistiretin qazaqstandyq boksshylar: Jánibek Álimhanuly, Janqosh Turarov, Rýslan Myrsataev, Alı Ahmetov, Aıdar Sháribaev, Juman Jumabekovtyń qarsylastary belgili boldy.
Naqtyraq aıtqanda, Rıo olımpıadasynyń qatysýshysy Jánibek Álimhanuly AQSh sportshysy Mılton Nýnezben qolǵap túıistiredi. 79 keli salmaqta olar 6 raýnd bokstasady.
Janqosh Turarov ganalyq Azek Arıımen 66 kelide 10 raýnd kúsh synasady.
Búgingi salmaq ólsheý rásiminde 99 kelini kórsetken otandasymyz Rýslan Myrsataev ganalyq Nýhý Azýmımen (103 keli) qolǵap túıistiredi. Olar 10 raýnd berilip otyr.
Qazaqstandyq Álı Ahmetov (78 keli) ázerbaıjandyq Álı Mammedovpen (77 keli) 6 raýndqa jekpe-jekke shyǵady.
Otandasymyz Aıdar Sháribaev (60 keli) ıspanııalyq Hýan Veneno Okýromen (59 keli) 6 raýndqa jekpe-jekke shyǵady.
Al Juman Jumabekov (63 keli) Belarýs boksshysy Vladımır Ivanovpen (63 keli) 4 raýnda kúsh synasady.
Eske sala keteıik, Almatyda 29 qazan kúni «Almaty arena» sport saraıynda Qanat Islam men Patrık Alloteı WBA (Interim) tujyrymy boıynsha álem chempıony ataǵyna talasady.
Birinshi orta salmaqta «WBA Fedelatin» ataǵyna ıe Qanat Islam osy ýaqytqa deıin 21 kezdesý ótkizip, barlyǵynda jeńiske jetken. Onyń 18-in nokaýtpen utqan.
Patrık Alloteı osyǵan deıin kásipqoı sharshy alańda 36 jekpe-jek ótkizgen. Onyń 34-inde qarsylastarynan basym túsken. Onyń 24-de qarsylastaryn nokaýtpen utsa, 2 jekpe-jeginde ǵana qarsylastaryna ese jibergen. Cońǵy ret 24 maýsym kúni sharshy alańǵa shyǵyp, otandasy Sanı Idanany jeńgen. Jekpe-jekteriniń barlyǵyn derlik Ganada ótkizgen. Úsh kezdesýi ǵana ózge elde ótken. Kásipqoı boksta «Ýly jebe» degen laqap atqa ıe.
32 jastaǵy Qanat Islam bul jekpe-jekke jattyqtyrýshysy Nelson Lopespen birge Almatydaǵy AIBA (Halyqaralyq áýesqoı boksfederatsııasy) boks akademııasynda jattyqty.
Qanat Islam bul kezdesýden keıin jyl sońyna deıin Amerıka qurlyǵynda taǵy bir jekpe-jek ótkizýdi josparlap otyrǵanyn buǵan deıingi BAQ-pen kezdesýinde aıtqan bolatyn. Ol 2017 jyly «kem degende tórt kezdesý ótkizbek.
Qanat Islam Alloteıge deıin 2016 jylǵy 9-mamyrda Florıda shtatynda kolýmbııalyq Hýan de Anhelmen kezdesip, altynshy raýndta jeńiske jetken.
Qytaıda týǵan Qanat Islam sol eldiń atynan Beıjiń Olımpıadasyna qatysyp, qola medal ıelengen. Osy Olımpıadadan keıin ol Qazaqstanǵa qonys aýdarǵan. Qanat Islam 2012 jylǵy London Olımpıadasyna Qazaqstan atynan qatyspaq bolǵan kezde azamattyq-quqyqtyq daý týǵan soń kásipqoı boksqa bet burǵan. Keıin Maıamıge (AQSh) baryp, Nelson Lopestiń proýmoýterlik kompanııasymen kelisimshart jasasqan. Qazir Qanat Islamnyń barlyq kezdesýin osy kompanııa uıymdastyryp júr.
