Boks: Qazaqstannyń jastar quramasy Álem chempıonatynda 1-oryn alýdy josparlaýda
ASTANA. 22 shilde. QazAqparat /Jasulan Amanbaıuly/ - Astanada 23-30 shilde aralyǵynda «Qazaqstan» sport kesheninde jastar arasynda bokstan Álem chempıonaty ótedi. Jarysqa álemniń 50 elinen 500-ge tarta qatysýshysy keledi dep kútilýde.
Baıraqty básekede qazaqstandyq boksshylar jalpy komandalyq esepte birinshi oryndy ıelenýdi josparlap otyr. Bul týraly búgin Astanada ótken baspasóz máslıhaty barysynda Qazaqstan boks qaýymdastyǵynyń vıtse-prezıdenti Serik Qonaqbaev málim etti.
Halyqaralyq boks federatsııasynyń (AІVA) prezıdenti Chıng-Kýo Výdyń aıtýynsha, Qazaqstan jastar quramasynyń buǵan barlyq múmkindigi bar. Sebebi, qurama álemniń eń úzdik boksshylardyń otany sanalatyn Kýba, Reseı, Ýkraına jáne Ázirbaıjan elderdiń qatarynda jáne óte bedeldi oryndy ıelenedi.
Máslıhatta atap kórsetilgenindeı, búgin boksshylar salmaq ólsheıdi jáne jarystyń jerebe tartý rásimi ótedi. Alǵashqy kezdesýler erteń, 23 shilde kúni bastalady.
«Búgin 16.00-de jerebe tartylady, erteń 14.30-da alǵashqy kezdesýler bastalady, al 16.00-de chempıonattyń saltanatty ashylý rásimi ótedi», - dep atap ótti S. Qonaqbaev.
Qazaqstan atalǵan dodaǵa 13 boksshyny qatystyrady. Respýblıkanyń jastaryn bas bapker Sultan Kostoev bastap barady.
Baıraqty básekede el namysyn Oljas Qalaýbek (46 keli), Zańǵar Temirhan (48 keli), Álibek Basapa (50 keli), Raýan Zatýlla (52 keli), Bekjan Qıbatqalıev (54 keli), Erbolat Ermekov (57 keli), Aıan Qalybekov (60 keli), Dáýitbek Qaıyrgeldi (63 keli), Aqylbek Ádilǵazıev (66 keli), Dáýlet Baıǵabatov (70 keli), Asqar Dúısáli (75 keli), Tilek Qozbaqov (80 keli), Dıdar Tólen (+80) qorǵaıtyny belgili boldy.
Jarystyń aqtyq syny 30 shildege belgilengen.
«Bokstan álem chempıonatynyń ótkizilýi bizdiń eldegi jankúıerlerdiń jáne halyqtyń úlken qyzyǵýshylyǵyn oıatty. Osy kúnderi birinshilikte ónerlerin pash etetin kóptegen qatysýshylar bolashaq juldyzdar atanatynyna kúmánim joq jáne olardy Brazılııada ótetin Olımpıadada kórip qalýymyz ǵajap emes», - deıdi S. Qonaqbaev.
Aıta keteıik, 2009 jyly alǵash ret uıymdastyrylǵan álem chempıonatyna 47 elden 283 bylǵary qolǵap sheberi qatysqan bolatyn. Qazaqstan sol chempıonatta 3 kúmis, 1 qola medalmen jalpykomandalyq esepte 9 orynǵa taban tiregen edi.
