Boks: Qazaqstandyq qyzdar Azııa chempıonatynyń jartylaı fınalynda baq synaıdy
ASTANA. QazAqparat - Búgin Vetnamnyń Hoshımın qalasynda bokstan áıelder arasyndaǵy Azııa chempıonatynyń 1/2 fınaldyq jekpe-jekteri ótedi.
11 elden jınalǵan sportshylar qurlyq týrnıriniń medaldaryn sarapqa salady.
Jartylaı fınalǵa Úndistannan - 7, Qazaqstan men Vetnamnan - altaýdan, Qytaıdan - 5, Soltústik Koreıadan - 4, Taıpeı men Ózbekstannan - tórteýden, Mońǵolııa men Ońtústik Koreıadan - ekeýden jáne Taıland pen Japonııadan bir-bir sportshy qatysady.
«Statıstıka bıylǵy Azııa chempıonatynda Úndistan, Qazaqstan, Vetnam, Qytaı jáne Soltústik Koreıa ókilderi medaldar úshin kúres júrgizetin basty komandalar ekenin kórsetedi. Kambodja, Mıanma, Nepal sııaqty týrnır debıýtanttary medaldar sarapqa salynatyn satyǵa kóterile almady. Degenmen osy elderden kelgen boksshy qyzdar aıtarlyqtaı tájirıbe jınaqtady», - deıdi Azııa boks konfederatsııasynyń atqarýshy dırektory Baǵdáýlet Tórehanov.
Azııa birinshiliginiń fınaldary 2017 jylǵy 8 qarashada ótedi.
Jartylaı fınaldyq jáne fınaldyq aıqastardyń onlaın-translıatsııasy www.asbcnews.org saıtynda Astana ýaqytymen 13:00-de bastalady.
