Boks: Qazaqstandyq Valentına Halzovaǵa joldama buıyrmady
ASTANA. KAZINFORM - Italııanyń Býsto-Arsıtsıo qalasynda ótip jatqan lıtsenzııalyq týrnırde qazaqstandyq boksshy Valentına Halzova shırek fınalda qarsylasynan utylyp, Parıj olımpıadasynyń joldamasynan qaǵyldy.
Otandasymyz shırek fınalda Halzova Ulybrıtanııa boksshysy Kındı Ngambamen Olımpıada joldamasyn sarapqa saldy. Nátıjesinde fızıkalyq myqtylyǵyn utymdy paıdalanǵan Kındı Ngamba otandasymyzdy 3 márte nokdaýnǵa túsirip, ýaqytynan buryn jeńiske jetti.
Osylaısha Italııaǵa barǵan bes burymdy boksshymyzdyń úsheýi jarysty erte aıaqtasa, Halzova shırek fınalda utyldy. Endi qyzdarymyzdan tek Alýa Balqybekova ǵana qaldy. Ol keshki sessııada Germanııa boksshysy Maksı Karına Kloetzermen qolǵap túıistiredi. Jekpe-jek ýaqyty 23:00-ge josparlanǵan.
Osy oraıda aıta keteıik, ázirge áıelder arasynda Parıj Olımpıadasynyń bir ǵana joldamasy bar. Ony ótken jyly Hanchjoýdaǵy Azııa oıyndarynda (Qytaı) 57 kelide álem chempıonatynyń 3 dúrkin júldegeri, 27 jastaǵy Karına Ibragımova jeńip alǵan bolatyn.
Sonymen qatar búgin 51 kelide Sáken Bıbosynov ulybrıtanııalyq Kıaran Makdonaldpen 00:00-de sharshy alańǵa shyǵady. Sáken Bıbosynovtyń qarsylasy — Eýropa chempıonatynyń kúmis júldegeri.
57 keli salmaqta synǵa túsip jatqan jerlesimiz Sabyrhan Mahmud tájikstandyq 2011 jyly Astana tórinde ótken jasóspirimderdiń álem chempıonatynda top jarǵan jáne 2011 jyly álemde eń myqty jasóspirim ataǵyn jeńip alǵan Asror Vohıdovpen qolǵap túıistiredi. Jekpe-jek 00:30 shamasyna josparlanǵan.
Sabyrhan Mahmudtan keıin ile-shala 71 keli salmaqtaǵy otandasymyz Aslanbek Shymbergenov Ázerbaıjan boksshysy Varhan Alıevpen kúsh synasady. Onyń qarsylasy — 2021 jylǵy álem chempıonatynyń qola júldegeri.
Sonymen qatar 80 keli salmaqtaǵy jerlesimiz Nurbek Oralbaı Astana ýaqytymen 01:30 shamasynda 2021 jylǵy álem chempıonatynyń shırek fınalısi, Eýropa oıyndarynyń kúmis júldegeri Irlandııa boksshysy Kelın Kassıdımen Olımpıada joldamasyn sarapqa salmaq.
Aıta ketsek, lıtsenzııalyq týrnırde jartylaı fınalǵa deıin jetken boksshylar 2024 jylǵy Olımpıada oıyndaryna joldama alady.
