Boks: Qazaqstan týmasy WBC jáne WBO tıtýlyn qorǵady
ASTANA. QazAqparat - Nemis boksshysy Krıstına Hammer ganalyq Gıftı Amanýa Ankrany nokaýtpen jeńdi, dep habarlaıdy Sports.kz.
Mıýnhende (Germanııa) ótken jekpe-jek on raýndqa eseptelgen. Hammer qarsylasyn tórtinshi raýndta nokaýtqa túsirip, orta salmaqtaǵy WBC jáne WBO tıtýlyn qorǵady. Nemis sportshysy úshin bul jetistik kásibı rıngtegi 22-shi jeńisi bolǵan.
«Áli de chempıonmyn. Men qarsylasymdy tórtinshi raýndta sulattym. Bul men úshin jattyǵý sanalady, sebebi meniń armanym - AQSh-ta úlken aıqastarǵa shyǵý jáne ol armanym qańtarda oryndalmaq. Komandama, maǵan sengen adamdarǵa rahmet», - dep jazdy Hammer óziniń Instagram paraqshasynda.
Aıta keteıik, Krıstına Qaraǵandy oblysynda (Novodolınka kenti) dúnıege kelgen, keıin balalyq shaǵynda ata-anasymen Germanııaǵa kóship ketken - qazir sportshy Dortmýndta turady.
