Boks: Qazaqstan qorjynynda úshinshi altyn, V.Levıt - Azııa chempıony
ASTANA. QazAqparat Bangkokte ótip jatqan bokstan Azııa chempıonatynda Vasılıı Levıt ózbek boksshysyn aıqyn basymdyqpen jeńip, Azııa chempıony atandy.
91 keli salmaq sanatynda óner kórsetken V.Levıt sharshy alańda ózbek komandasynyń eń tájirıbeli boksshylarynyń biri Rýstam Týlaganovpen kezdesip, alǵashqy raýndta ese jiberip qoıdy. Ekinshi raýnda jınaqylyq tanytqan Vasılıı qarsylasyn aýyr soqqylardyń astyna alyp, esepti teńestire aldy. Sheshýshi raýnd ta da Vasılıı qarsylasynan basymdyq tanytty. Osylaısha, ol Qazaqstan qorjynyna Azııa chempıonatynyń úshinshi altynyn saldy. Buǵan deıin 52 keli salmaq sanatynda sharshy alańǵa kóterilgen jerlesimiz Oljas Sáttibaev buǵan deıin ózbek boksshysy Shahobıddın Zoırovti jeńip, elimizdiń qorjynyna alǵashqy altyn medal salǵan bolatyn. Odan keıin Danııar Eleýsinov Jasóspirimder arasynda 2011 jyly álem chempıony bolǵan fılıppındik Eýmır Martsıaldy jeńip, Azııa chempıony atanǵan edi. Al ókinishke oraı, 60 keli salmaq sanatynda shashy alańǵa kóterilgen boksshymyz Zákir Safıýllın 2014 jylǵy Azıada chempıony atanǵan mońǵol boksshysy Otgondala Dorjnıambýýǵa ese jiberip, kúmis medaldi qanaǵat tutqan bolatyn.
