Boks: Qazaqstan chempıonatyna 180-ge tarta sportshy qatysýda
ASTANA. 23 qarasha. QazAqparat - Astanada bokstan eresekter arasynda Qazaqstan ulttyq chempıonaty óz jalaýyn kóterdi.
Oǵan 14 oblystan jáne Astana men Almaty qalalarynan 179 boksshy qatysýda. San jaǵynan eń úlken jasaq - 16 sportshy usynǵan Astana quramasy. Almaty 15 boksshyny alyp kelgen. Eń az ókildik Atyraý, BQO jáne SQO oblystarynyń enshisinde. Olar birinshilikke bes-bes boksshymen óner kórsetedi.
Buryn habarlaǵanymyzdaı, jekpe-jek barysynda boksshylar arnaıy shlemsiz judyryqtasady. Sonymen qatar kezdesýdi bes tóreshi emes, úsh tóreshi baǵalaıtyn bolady. osyǵan oraı, Qazaqstannyń boks federatsııasy tóreshiliktiń sapasyn arttyrý maqsatynda, aldyn ala tóreshilerge semınarlar ótkizgen. Oqytý barysynda otandyq mamandar AIBA sarapshylarynyń jetekshiligimen jańa júıeniń syryn meńgergen. Bul júıe WSB nusqasyndaǵy jekpe-jekterde keńinen qoldanylyp júr.
Bokstyń jańashyldyqtary tek eresekter arasynda engizilgen. Balalar men áıelder burynǵysynsha bas shlemimen judyryqtasady.
Qazaqstan birinshiligi «Dáýlet» ulttyq tennıs ortalyǵynda 22-29 qarasha aralyǵynda ótedi.
