Boks: Qaırat Eralıev Álem chempıonatynda Ózbekstan boksshysynan jeńilip qaldy
ASTANA. QazAqparat - Katarda ótip jatqan bokstan Álem chempıonatynda Qazaqstan quramasynyń 56 kelidegi boksshysy Qaırat Eralıev ózbekstandyq Mýradjan Axmedalıevten aılasyn asyra almady.
Tartysty ótken kezdesýde alǵashqy raýndty óte qarqyndy bastaǵan Ózbekstan boksshysy jeńiske jetti. Jeńistiń sýsyp bara jatqanyn sezgen Q. Eralıev ekinshi raýndta belsendiligin údete túsken. Alaıda onda da qazylar kórshi eldiń ulanyna jeńisti ustatty. Úshinshi raýndta da M. Axmedalıev qazaqstandyq boksshyny san soqtyryp ketti.
Osylaısha, Q. Eralıev ózi ekinshi ret qatysyp otyrǵan álem chempıonaty dodasynda alǵashqy kezeńde jeńilis taýyp otyr.
Aıta keteıik, bunyń aldynda Zakir Safıýllın Katardaǵy Álem chempıonatynan shyǵyp qalǵan bolatyn.
