BOKS: I.Dychko fınalǵa shyqty
ASTANA. QazAqpart - Tashkentte ótip jatqan Sıdneı Djeksondy eske alýǵa arnalǵan bokstan halyqaralyq týrnırda Qazaqstan boksshysy Ivan Dychko fınalǵa shyqty, dep habarlady QR Boks federatsııasynyń baspasóz qyzmetinen.
Keshe baıraqty básekeni shırek fınaldyq kezdesýden bastaǵan boksshymyz ázerbaıjandyq qarsylasy Asef Aslanlydan aılasyn asyrǵan bolatyn. Al búgin jartylaı fınalda ózbekstandyq Bahodyr Djalolovpen qolǵap túıistirip, 3:0 esebimen jeńiske jetti.
Al erteń boksshymyz ózbekstandyq taǵy bir bylǵary qolǵap sheberi Mırzohıdjon Abdýllaevpen aıqasqa túsedi. Ózbek boksshysy ótken jyly Almatydaǵy bokstan álem chempıonatyna qatysqan bolatyn. Budan bólek ol birqatar iri halyqaralyq jarystarda jeńimpaz atanǵan bar.
Aıta keterligi, I.Dychko - Djekson týrnırinde óner kórsetip jatqan Qazaqstan quramasynan jartylaı fınalǵa shyqqan jalǵyz sportshy. Buǵan deıin Tashkentegi jarys jolyn Zákir Safıýllın, Almasbek Orynǵalıev, Saparbaı Aıdarov jáne Nurdáýlet Jarmanov aıaqtaǵan bolatyn.
Eske sala keteıik, Londondaǵy Olımpıadanyń qola júldegeri, aýyr salmaqtaǵy qazaqstandyq boksshy Ivan Dychko Almatydaǵy álem chempıonatynyń fınalynda Magomedrasýl Medjıdovten nokaýtpen jeńilgen bolatyn. Ol rıngten dárigerlerdiń kómegimen ketti. Sportshynyń babyna kelýi úshin bir jyldaı ýaqyt qajet boldy.
