BOKS: Golovkın men Rýbıo tuńǵysh ret ESPN stýdııasynda kezdesti
ALMATY. QazAqparat- WBA (Super) nusqasy boıynsha orta salmaq dárejesindegi Álem chempıony 32 jastaǵy qazaqstandyq boksshy Gennadıı Golovkın men WVC nusqasy boıynsha osy salmaq dárejesindegi ýaqytsha Álem chempıony 34 jastaǵy meksıkalyq boksshy Marko Antonıo Rýbıo Los-Andjeles qalasyndaǵy ESPN stýdııasynda (AQSh-tyń Kalıfornııa shtaty) «A Los Golpes» baǵdarlamasy aıasynda tuńǵysh ret betpe-bet kezdesti.
Júrgizýshilerdiń biri aty ańyzǵa aınalǵan meksıkalyq boksshy Hýlıo Sezar Chaves boldy -dep habarlaıdy allboxing.ru saıty. Esterińizge sala keteıik, eki boksshynyń jekpe-jegi bıyl kúzde 18 qazan kúni Los-Andjeles qalasynyń 8 myń adam sııatyn StubHub Center arenasynda ótedi. Marko Antonıo Rýbıo buǵan deıin jýrnalısterge bergen suhbatynda jeńiske jetetindigine senimdi ekendigin bildirgen bolatyn. «Qazir Golovkınniń rekordyna qarap otyryp, ony orta salmaq kategorııasy boıynsha álemniń eń myqty boksshysy deýge bolady. Biraq 18 qarashada álemdegi eń úzdik boksshy ol emes men ekenimdi dáleldeýge múmkindik bar. Menińshe, Golovkın de men sekildi, óziniń sporttyq jolynda eń aýyr jekpe-jekke shyǵaıyn dep jatyr. Bul kezdesýde meniń tájirıbem úlken ról atqarady. Golovkın rıngte áli mundaı tájirıbemen, mundaı kúshpen ushyrasqan emes. Meniń kásipqoı bokstaǵy eń úzdiń jeńisterimniń biri - Devıd Lememen bolǵan kezdesý edi. Men ony tize búktirdim. Men sol joly kóp nárseni úırendim. Qazir kareramda tamasha ýaqyt týyndaǵanyn sezemin. Men qazir budan 5 jyl buryn Kellı Pavlıkpen kezdesken kezdegideı kúıde emespin. Endi men álemdegi eń úzdik boksshy atanýym úshin naǵyz babyndaǵy Golovkındi jeńýim kerek. Men mindetti úmitker bolsam da Mıgel Kotto menimen judyryqtasýdan bas tartqanyn ózderińiz bilesizder. Sol úshin biz Golovkınge usynys jasadyq. Ol kelise ketti. Demek, alda tamasha jekpe-jek bolaıyn dep tur» - dedi Rýbıo.
