BOKS: Golovkın men Leme úsh qalada aldaǵy jekpe-jek týraly baspasóz týrlaryn ótkizedi
ASTANA. QazAqparat - WBA (Super), IBO jáne WBC (Interim) nusqalary boıynsha orta salmaqtaǵy álem chempıony qazaqstandyq Gennadıı Golovkın (33-0, 30 KO) men osy salmaqtaǵy IBF tıtýlynyń ıegeri kanadalyq Davıd Leme (34-2, 31 KO) úsh qalada aldaǵy jekpe-jekteri boıynsha baspasóz máslıhattaryn ótkizedi, dep habarlaıdy Fightnetwork.com.
Golovkın men Leme qatysatyn baspasóz týry 18 tamyzda Nıý-Iorkte bastalyp, 19 tamyzda kanadalyq Kvebek qalasynda jalǵasady. 20 tamyz kúni Los-Andjeleste sońǵy týr ótedi. Eske sala keteıik, 33 jastaǵy qazaqstandyq Gennadıı Golovkın kelesi jekpe-jegin 17 qazanda Nıý-Iorkte (AQSh) ótkizedi. Onyń qarsylasy osy salmaqtaǵy IBF nusqasy boıynsha álem chempıony 26 jastaǵy kanadalyq Davıd Leme bolady. Golovkın men Leme jekpe-jeginiń bıletteri 12 tamyzdan bastap satylýda. Quny $500, $300, $200, $100 jáne $50 bolatyn bıletterdi Ticketmaster.com saıty arqyly nemese Madison Square Garden kassalarynan alýǵa bolady. «Qazaqstan» ulttyq telearnasy Gennadıı Golovkın men Davıd Leme arasyndaǵy jekpe-jekti tikeleı efırde kórsetedi.
