BOKS: Gennadıı Golovkın Ýgandy Kassıma Oýmamen sharshy alańda kezdesedi
ALMATY. 14 maýsym. QazAqparat /Ádilet Musahaev/ - Dúnıejúzilik boks qaýymdastyǵynyń (WBA) nusqasy boıynsha orta salmaqtaǵy Álem chempıony otandasymyz Gennadıı Golovkın maýsymnyń 17-si kúni Panamada óziniń chempıondyq ataǵyn saqtap qalý úshin Ýgandy Kassıma Oýma esimdi bylǵary qolǵap sheberimen bolatyn kezdesýge daıyndyq ústinde.
G.Golovkınniń qarsylysy kásibı sharshy alańda 36 kezdesý ótkizgen. Onyń 27-de jeńiske jetse, 7-de jeńiliske ushyraǵan.
Atalǵan kezdesý Panamanyń astanasyndaǵy 16 myń kórermen sııatyn bokstan álemniń birneshe dúrkin chempıony atanǵan Robert Dıýran atyndaǵy sport kesheninde ótedi. Bul keshke kirý bıleti bir aı buryn satylymǵa túskendikten qazirgi tańda ol tolyǵymen satylyp bitken.
Búginde Gennadıı Golovkın AQSh-tyń Kalıfornııa shtatyndaǵy Bıg Ber mekeninde atalǵan kezdesýge qorytyndy jattyǵýlaryn júrgizýde. Óz ataǵyn saqtap qalý aıasynda otandasymyz WBC nusqasy boıynsha meksıkalyq Saýl Alvares syndy birneshe tanymal boksshylarmen kezdesýler ótkizgen bolatyn. Qazaqstandyq boksshynyń Panamaǵa ushýy maýsymnyń 15-ine belgilengen.
Gennadıı Golovkın men Kassıma Oýmanyń sharshy alańda synǵa túsýine telearnalar úlken qyzyǵýshylyq tanytyp otyr. Qazaqstandyq boksshynyń qatysýyndaǵy kesh «BOETs», Sport 1 (Ýkraına), Sport 1 (Germanııa) arnalarynda kórsetiledi. Al otandyq boks súıer qaýym kezdesýdi «Astana» telearnasynan kóre alady.
