BOKS: G.Golovkın Rýbıomen judyryqtasýy 12 raýndqa deıin jalǵasýy múmkin ekenin málim etti
ASTANA. QazAqparat - WBA nusqasy boıynsha orta salmaqtaǵy álem chempıony qazaqstandyq Gennadıı Golovkın meksıkandyq Marko Antonıo Rýbıomen ótetin kezdesý barlyq 12 raýndqa jalǵasýy múmkin degen boljamyn joqqa shyǵarmady. Bul týraly VKontakte jelisindegi «GGG» tobynyń paraqshasynda jarııalanǵan.
«Ol men úshin óte mańyzdy ári qazir myqty qarsylas. Men onyń judyryqtasý stılin osyǵan deıingi qarsylastarymmen salystyra almaımyn. Men úshin mundaı jaǵdaı birinshi ret. Bul úlken synaq. Meniń bul kezdesýge daıyndyǵym da ózgeshe. Bul kezdesý múmkin tóreshilerdiń sheshimimen aıaqtalatyn shyǵar, jáne maǵan osyndaı kezdesý kerek. Men Marko Antonıonyń aqyldy jigit ekenin bilemin. Ol maǵan lakı-panch úshin úlken múmkindikter bermeıdi», - dedi baspasózge bergen suhbatynda G.Golovkın. Eske sala keteıik, 32 jastaǵy qazaqstandyq Gennadıı Golovkınniń 34 jastaǵy meksıkandyq Marko Antonıo Rýbıomen kezdesýi 19 qazan kúni tańerteń Karsondaǵy (AQSh, Kalıfornııa shtaty) StubHub Center-de ótedi. Bul dodany KazSport telearnasy Astana ýaqyty boıynsha shamamen tańǵy saǵat 7-lerde tikeleı efırde kórsetedi.
