Boks federatsııasy kýbogynyń bıylǵy júlde qory - 25 mln teńge (FOTO)
ASTANA. QazAqparat - Búgin Astanada Qazaqstan boks federatsııasynyń kýbogy úshin ótetin VII maýsymdyq jarystardyń jerebesi tartyldy. 16 oblys, Astana jáne Almaty qalalarynyń komandalary tórt topqa bólinip, jarys ótkizetin oblystar men qalalar belgili boldy.
Aıta keteıik, jerebeni Olımpıada chempıony Serik Sápıev pen álem chempıony Danııar Eleýsinov tartty.
«Barlyq komandalar myqty. Biraq, eń myqtylary jeńiske jetedi. Bıylǵy kýboktyń ereksheligi - jeńimpaz komandaǵa 25 mln teńge beriledi. ıAǵnı, kýboktyń bıylǵy júlde qory 25 mln teńgeni quraıdy jáne ony birinshi oryn alǵan komanda ǵana alady. Kelesi jyly júlde qoryn alǵashqy úsh oryn alǵan komandaǵa bólý máselesin qarastyramyz»,-dedi jerebe tartylyp bitken soń, jýrnalıstermen áńgimelesken Qazaqstan Boks federatsııasy ulttyq qurama komandalarynyń koordınatory, QR memlekettik jattyqtyrýshysy Bolat Ábdirahmanov.
Jalpy, jerebege túsken aımaqtar men eki qalanyń komandalary tórt «korzınaǵa» bólingen. Birinshi korzınadaǵy OQO, Astana qalasy, Almaty oblysy men Mańǵystaý oblysynyń komandalary eń myqtylar dep sanaldy. Ekinshi sebettegi Jambyl oblysy, Almaty qalasy, Qaraǵandy oblysy men Aqmola oblysynyń komandalary jeńisi kóp komandalar qatarynan tabyldy. Úshinshi korzınadaǵy Atyraý oblysy, Pavlodar oblysy, ShQO men Qyzylorda oblysynyń komandalary ortasha jetistikteri bar komandalar bolyp sanaldy. Tórtinshi korzına - aýtsaıderler edi, ıaǵnı, SQO, Qostanaı oblysy, BQO men Aqtóbe oblysynyń komandalary aýtsaıderlerge qosylǵan.
Al, Serik Sápıev pen Danııar Eleýsinov tartqan jerebe qaǵazdaryna saı, osy komandalar «A», «S», «V» jáne «D» toptaryna bólindi.
Sonymen, Almaty oblysy, Shyǵys Qazaqstan oblysy, Soltústik Qazaqstan oblysy men Almaty qalasynyń komandalary «A» tobyna tústi.
Mańǵystaý oblysy, Jambyl oblysy, Pavlodar oblysy men Aqtóbe oblysy «B» tobynda bokstasatyn boldy.
«S» tobynda Qaraǵandy oblysy, Qyzylorda oblysy, Qostanaı oblysy men Astana qalalarynyń komandalary kúsh synasady.
Ońtústik Qazaqstan oblysy, Aqmola oblysy, Atyraý oblysy men Batys Qazaqstan oblysynyń komandalary «D» tobyna jaıǵasty.
«A» tobyndaǵy komandalardyń jarysy Taldyqorǵan qalasynda ótetin boldy.
«V» tobynyń komandalary Aqtaýda, «S» tobyndaǵy komandalar Qyzylordada, D tobynyń komandalary Kókshetaý qalasynda bokstasady. Jarystyń shırek fınaly 8-11 qyrkúıek aralyǵynda, jartylaı fınaly men fınaly 14-15 jeltoqsan kúni ótetini belgili boldy.
