Boks federatsııasy Qamshybek Qońqabaevtyń Strandja týrnırinde rıngke nege shyqpaǵanyn túsindirdi

ASTANA. QazAqparat – Qazaqstan boks federatsııasy Qamshybek Qońqabaevtyń Bolgarııa astanasy Sofııa qalasynda ótip jatqan «Strandja» týrnırinde 1/8 fınalda ózbekstandyq Bahodır Jalolovpen kezdesýge nege shyqpaǵanyn túsindirdi, dep habarlaıdy QazAqparat tilshisi.

Qazaqstan boks federatsııasynan málim etkenindeı, Qamshybek Qońqabaev qolyndaǵy jaraqatyna baılanysty rıngke shyqpady.

«Sonymen qatar jattyqtyrýshylar shtabynyń aıtýynsha, aýyr salmaqtaǵy sportshymyzdyń jattyǵý men jarys protsesine tolyq qatysýǵa ýaqyty tym az boldy. Alda mańyzdy jarystar – Tashkentte ótetin álem chempıonaty men Hanchjoýdaǵy Azııa oıyndary kútip turǵandyqtan, Qamshybek qalpyna kelip, eń aldymen densaýlyǵyn oılaýy qajet», delingen arnaıy málimdemede.

Eske sala keteıik, budan buryn bokstan «Strandja» kýboginde Orazbek Asylqulovtyń ¼ fınalǵa shyqqanyn jazǵan bolatynbyz.

Sondaı-aq Bekzat Nurdáýletov kelesi kezeńge ótti.