BOKS: F.Meıvezer men M. Pakıao jekpe-jeginen túsetin tabys 400 mln. dollarǵa jetýi múmkin
ALMATY. QazAqparat - Floıd Meıvezer men Mennı Pakıao jekpe-jeginen túsetin jalpy tabys 400 mıllıon AQSh dollaryna jetýi múmkin. Bul somanyń jartysy boksshylarǵa beriledi. Meıvezerdiń tabysy 120 mln. dollardy quraýy yqtımal.
Al Pakıao shamamen 80 mln. dollar alady. Boks tarıhynda áli birde-bir boksshy bir kezdesýde mundaı kólemde syıaqy alyp kórgen emes, - dep habarlaıdy allboxing.ru portaly.
Ústimizdegi jyly 2 mamyrda Las-Vegas qalasynyń (AQSh, Nevada shtaty) MGM Grand (Qonaq úı-oıyn-saýyq kesheni, sıymdylyǵy 16800 adam) sport arenasynda álemniń eń úzdik boksshylary reıtınginiń kóshbasshysy , WBC jáne WBA (Super) nusqalary boıynsha jartylaı orta salmaq (66,678 keli) jáne birinshi orta salmaq (69,85 keli) dárejelerindegi Álem chempıony, 37 jastaǵy amerıkalyq bylǵary qolǵap sheberi kishi Floıd Meıvezer (47-0, 26 KO) men WBO nusqasy boıynsha jartylaı orta salmaq dárejesindegi Álem chempıony, 36 jastaǵy fılıppındik boksshy Mennı Pakıao (57-5-2, 38 KO) qolǵap túıistiredi.
Bul kezdesýdiń asa ózgeshe bolatyndyǵy ázirden-aq baıqalýda. Jekpe-jek týraly resmı habar taratyla salysymen, 15 mınýttyń ishinde MGM Grand qonaq úıiniń barlyq nómirleri 2-3 mamyr kúnderi boıynsha satylyp ketipti.
Al bıletterdiń baǵasy ázirge belgilenbegen. Biraq, onyń rekordtyq deńgeıde bolatyndyǵy aıdan anyq. Eń qymbat bıletter 5 000 dollarǵa jetedi kútilýde. Buǵan deıin bıletterdiń baǵasy eshqashanda 2 500 dollardan aspaǵan eken.
Sonymen, aldaǵy jekpe-jek jartylaı orta salmaq (147 fýnt; 66,7 keli) dárejesinde ótedi. Bul jerde qatarynan úsh Álem chempıony ataǵy - Meıvezerge tıesili WBA (Super) jáne WBC jáne Pakıaoǵa tıesili WBO nusqalary sarapqa salynady.
Syıaqy mólsheri Meıvezerdiń paıdasyna qaraı 60 ta 40 úılesimimen bólinetin boldy. Aldyn ala esep boıynsha bıletterdi satýdan túsetin tabys shamamen 40 mıllıon dollardy qurasa, aqyly PPV-translıatsııadan túsetin tabys 250 mıllıon dollardan asýy múmkin. Alaıda, bul somanyń jartysyn PPV operatorlar alatyny belgili. Translıatsııalaý quqyǵyn basqa elderge satýdan túsetin tabys 30 mıllıon dollardan asýy yqtımal. Sondaı-aq, kezdesýge qatysty atrıbýttardy satýdan da qomaqty tabys túsetini anyq. Odan basqa, birneshe iri kompanııa aldaǵy kezdesýge demeýshi bolýǵa nıet bildirip otyr.
Boks súıer qaýym kópten kútken bul jekpe-jektiń bolatyndyǵyn eń aldymen álemniń eń úzdik boksshylary reıtınginiń kóshbasshysy 37 jastaǵy Floıd Meıvezerdiń ózi áleýmettiń jelilerdiń birinde ústimizdegi jyldyń 21 aqpanyna qaraǵan túni jarııalady.
«Búkil álem taǵatsyzdana kútken jekpe-jekke jol ashyldy. Meıvezer Pakıaoǵa qarsy, 2 mamyrda, mámile jasalyndy. Men jankúıerlerge buǵan qol jetkiziledi dep ýáde berip edim ǵoı. Mine, solaı boldy da. 2 mamyrda biz tarıhı jekpe-jekti nazarlaryńyzǵa usynamyz. Jiberip almańyzdar», - dep jazdy Meıvezer.
Kóp uzamaı 36 jastaǵy Mennı Pakıao áleýmettik jelilerdiń birindegi óz paraqshasynda bul jaǵdaıǵa qýanyshty ekendigin bildirdi.
«Biz Floıd ekeýmiz jankúıerler nazaryna, olar talaı jyldan beri sarǵaıa kútken jekpe-jekti usyna alatyndyǵymyzǵa óte qýanyshtymyn. Men bul kezdesýdi, ony kútken jankúıerlerge jáne Fılıppın halqyna arnaımyn» - dedi Pakıao.
Aıta ketelik, eki boksshynyń kezdesý jaıynda kelissózderi sonaý 2010 jyldan beri júrgizilip kele jatqan edi. Ol kezde basty másele keńeıtilgen dopıng-test boldy. Pakıao Meıvezerdiń barlyq shartyna kóngen soń, bul másele sheshildi. Endi dopıng-testi Nevada shtatynyń Atletıkalyq komıssııasynyń (NSAC) qatysýymen USADA (Búkilálemdik dopıngke qarsy agenttiktiń amerıkalyq bólimshesi) uıymy júrgizetin boldy.
Jekpe-jekti boks tarıhynda osymen ekinshi ret HBO jáne Showtime telearnalary birlese translıatsııalaıtyn bolady. Meıvezer Showtime, al Pakıao HBO telearnasymen kelisimshartqa otyrǵany belgili. Esterińizde bolsa, birinshi ret mundaı birlesken translıatsııa 2002 jyly Maık Taıson men Lennoks Lıýıs arasyndaǵy kezdesýde júrgizilgen bolatyn.
Kezdesý aqyly translıatsııa júıesi boıynsha kórsetiledi.
Rıng anonserler Maıkl Baffer men Djımmı kishi-Lennon bolady. ıAǵnı, Baffer HBO ókili retinde Pakıaonyń shyǵýyn, sáıkesinshe Lennon Meıvezerdiń shyǵýyn jarııalaıdy.
Árbir boksshy ózi qalaǵan qolǵapty tańdaıdy. Aıta ketelik, Meıvezer Grant fırmasynyń, al Pakıao Cleto Reyes-tiń qolǵabyn kıetini belgili.
