Boks: Erkejandy jeńgen vetnam «qyzy» erkek bolyp shyqty

ASTANA. QazAqparat - Bir aıdan astam ýaqyt buryn, naqtyraq aıtqanda, sáýirdiń 19-27 aralyǵynda Taıland eliniń astanasy Bangkokta bokstan jastar arasyndaǵy Azııa chempıonaty ótti. Munda qurlyqtyń otyzdan astam elinen kelgen kil myqty sportshylar jarys jolyna shyqty. Óz salmaǵynyń úzdigi atanýmen qatar, Jasóspirimder Olımpıada oıyndaryna joldama ıelený úshin baq synasty. Atap óterlik jaıt, elimiz bylǵary qolǵap básekesinde Azııa qurlyǵynda teńdessiz ekendigin taǵy bir dáleldedi. 10 altyn, 4 kúmis jáne 4 qola júldemen jalpykomandalyq esepte alǵashqy orynnan kórindi.

Altaynews.kz saıtynyń jazýynsha, saıys barysynda tańǵalarlyq jaǵdaı oryn alǵan. Máselen, shyǵysqazaqstandyq Erkejan Dáýletjanqyzy 57 kelige deıingi salmaqta altyn  medal ıelený úshin sharshy alańǵa shyqqan. Oǵan deıin burymdy boksshymyz Indonezııa, Mońǵolııa, Japonııa elderinen kelgen sportshylardy tas-talqan etip jeńgen. Fınalda Vetnam eliniń ókilimen kezdesip, tóreshiler jeńisti soǵan beredi. Al artynan onyń jynysyn aýystyrǵan er bala ekeni anyqtaldy.

Erkejannyń jattyqtyrýshysy Arman Tynybaevtyń aıtýynsha, vetnamdyq boksshy ótken jyldyń qarasha aıynda Úndistandaǵy álem chempıonatynda top jarǵan. Sol jerde ol Jasóspirimder arasyndaǵy Olımpıada oıyndaryna joldama ıelenedi.

«Onyń qımyly, kúlgeni, judyryqtasý máneri er balaǵa qatty uqsady. Azııa chempıonaty kezinde ol ózine kóp nazar aýdartty. Saıys máresine jetken soń, AIBA halyqaralyq boks qaýymdastyǵy sekemdenip, odan DNK synamasyn alǵan. Osylaısha shyndyqtyń beti ashylypty», - deıdi Arman Tynybaev.

Bapkerdiń aıtýynsha, jarys bitken soń, eki apta ýaqyt ishinde aıaq asty qýanyshty habar jetken. Muny elimizdiń qyzdar quramasynyń aǵa jattyqtyrýshysy Almaz Qýatbekov aıtqan eken. Endi jaqyn arada Erkejanǵa Azııa oıyndarynyń «altyny» men Jasóspirimder arasyndaǵy Olımpıada oıyndaryna joldama tapsyrylatyn bolady.