BOKS: Eger baǵasyna kelissem, 50-shi jekpe-jekti de ótkizýim múmkin - Floıd Meıvezer
ALMATY. QazAqparat - Álemniń eń úzdik boksshylarynyń kóshbasshysy 37 jastaǵy amerıkalyq bylǵary qolǵap sheberi kishi-Floıd Meıvezer men Showtime telearnasy arasynda biregeı kelisimshart jasalǵany belgili. Soǵan sáıkes, qandaı qarsylas bolmasyn, árbir uıymdastyrylǵan boks sharasy qarjy jaǵynan tabys ákelsin-ákelmesin, Floıd ár jekpe-jek úshin kem degende 32 mıllıon dollar syıaqy alyp otyrýy tıis.
Bul kelisimshart alty kezdesýge shaqtalǵan, dep jazady allboxing.ru saıty. Ázirshe úsh kezdesý artta qaldy. Alda taǵy úsh kezdesý bar. Eger Floıdtyń tasy órge domalap tursa, kelisimsharttyń sońynda onyń rekordy 49-0 bolady! Showtime telearnasymen aradaǵy kelisimshart aıaqtalǵan soń sporttyq karerasyn támamdaıtyndyǵy týraly Floıd buǵan deıin talaı ret aıtqan bolatyn. Biraq kúni keshe ol 50-shi kezdesýdi de ótkizýi múmkin ekendigin jetkizdi.
«Eger baǵasy durys bolyp jatsa jáne 50-shi jekpe-jekke qol jetkizgim keletin bolsa, onda barlyǵy da múmkin», - dedi Meıvezer BoxingScene.com portalyna bergen suhbatynda. - Meniń basty maqsattarymnyń biri - ol bir jekpe-jekti Nıý-Iorkte ótkizý».
Esterińizge sala keteıik, ótken jyly WBA nusqasy boıynsha álem chempıony qazaqstandyq bylǵary qolǵap sheberi Gennadıı Golovkın AQSh-tyń On the Ropes Boxing Radio-syna bergen suhbatynda:
«Floıd Meıvezermen jekpe-jek ótkizý - meniń armanym. Bul múmkin. Bul boks jankúıerleri úshin de, telearnalar úshin de, barlyǵy úshin de óte qyzyqty jekpe-jek bolar edi dep oılaımyn. Árıne, túsinemin, men HBO telearnasymen, al Floıd Showtime telearnasymen jumys isteıdi. Biraq men promoýterimnen surap edim, ol mundaı kezdesýdiń múmkin ekendigin aıtty. Men buǵan úmittenemin», - degen bolatyn.
Bul jerde bir aıta ketetin jaıt, Gennadııdiń promoýteri Tom Leffler myrza bıyl buqaralyq aqparat quraldaryna bergen suhbatynda shákirtiniń tek Floıd Meıvezermen bokstasý úshin ǵana birinshi orta salmaqqa ıaǵnı, 154 fýntqa (69.85 kg) deıingi salmaq kategorııasyna túsetindigin, basqa qyzyqtyrmaıtyn kezdesýler úshin túspeıtindigin nyqtap jetkizgen bolatyn. Sondyqtan, eger jaqyn bolashaqta bul kezdesý Floıdtyń qyzyǵýshylyǵyn týǵyzatyn bolsa, ol árıne osy 154 fýntqa kóterilýi tıis.
Boks jankúıerleri jatsa-tursa ańsaıtyn bul kezdesýdiń bolý-bolmaýy endi negizinen eki taraptyń qaltasy qalyń promoýterleri men ýaqyt enshisinde.
Qazirgi tańda Gennadıı Golovkın orta salmaqta ( 72,574 kg deıin), al Floıd jartylaı orta salmaqta (66, 678 kg) óner kórsetedi.
Gennadıı kúni búginge deıin kásibı rıngte 29 kezdesý ótkizip, barlyǵynda jeńiske jetken. Al Floıdyń rekordy ázirshe 46-0.
