BOKS: Dychkonyń sharshy alańǵa qaıta oralýy ózine baılanysty - Ulttyq quramanyń bas bapkeri
ASTANA. 30 qazan. QazAqparat - Dychkonyń jaǵdaıy Qazaqstan boksynyń barlyq jankúıerlerin alańdatyp otyr.
Degenmen, ulttyq quramamyzdyń bas bapkeri Myrzaǵalı Aıtjanov Dychkonyń hali jaqsarǵanyn aıtyp sendirýde, dep jazady «Alash aınasy» basylymy.
«Vanıa qazir ózine keldi. Densaýlyǵy jaqsy. Alaıda onyń sharshy alańdaǵy bolashaǵy ózine ǵana baılanysty. Álbette, fızıkalyq turǵyda biz ony jarty jyldyń ishinde-aq qaıta babyna keltire alamyz. Biraq psıhologııalyq turǵydan alǵanda bul nokaýttan qorytyndyny ózi shyǵarýy tıis. Jalpy, óz basym, mundaı boksshyny joǵaltyp alǵym kelmeıdi. Áli jas. Ómiri alda. Eger babyna qaıta kelse, álem chempıonattarynda da, Olımpıada oıyndarynda da jeńiske jetetin bolady. Biz oǵan 2014 jyldyń sáýirine deıin ýaqyt beremiz. Demalsyn, tynyqsyn, barlyǵyn umytsyn. Odan keıin ne bolaryn kóremiz. Birneshe týrnırge qatystyramyz da, aldaǵy ýaqytta oǵan úmit artýǵa bola ma, joq pa sony sheshemiz. Bári jaqsy bolsa, Dychko kelesi jyly jazǵy Azııa oıyndaryna qatysady», - deıdi Myrzaǵalı Qulanuly.
