Boks: Damır Býdanbekov Iraktan Qazaqstanǵa qaıta oralmaq
ASTANA. 15 sáýir. QazAqparat - Bokstan Irak quramasyn baptap júrgen qazaqstandyq Damır Býdanbekov kóktemniń sońynda elge qaıtyp kelmek.
Bul týraly bapker «Alaman» sport agenttigine bergen suhbatynda málimdedi.
«Qazir Irak elimen kelisim shartym aıaqtalýǵa jaqyn. Eger Londonǵa joldama alsaq, jumysymdy jalǵastyrar edim. Biraq ala almadyq. Degenmen, Irak boks federatsııasynyń meniń jumysyma kóńilderi toldy. Kelisim shartty sozýǵa da nıetti. Sebebi, Irak eli segiz jyl boıy Arab oıyndarynda birde bir altyn almaǵan. Mine, sol olqylyqtyń ornyn toltyryp, byltyr arab elderi olımpıadasynda bir altyn, eki kúmis ıelengen edik. Shyny kerek, qazir Irak halqy bul jeńisti áli toılap jatyr. Astanadaǵy synda lıtsenzııaǵa bir taban jaqyndadyq. Ókinishtisi, qol jetpedi. Endi jaqyn arada elge qaıtyp kelmekpin. Armanym jas balalarǵa arnalǵan boks mektebin ashý. Endi sol baǵytta jumys jasaımyn», - dedi D. Býdanbekov suhbatynda.
