BOKS: Búgin 6 boksshymyz jartylaı fınal joldamasy úshin aıqasady
ASTANA. QazAqparat - Keshe Katar astanasy Dohada ótip jatqan bokstan álem birinshiliginde shırek fınalǵa joldama alǵan (ár salmaqtan 8 boksshy) 80 sportshynyń aty-jónderi belgili boldy. Olardyń altaýy qazaqstandyq boksshylar. Búgin sol boksshylarymyzdyń qaı eldiń sportshylarymen judyryqtasatyny belgili boldy.
Shırek fınalǵa shyqqan Qazaqstannyń alty boksshysynyń ekeýi kúndizgi sessııada saǵat 18:00-de judyryqtassa, qalǵan tórteýi keshki baǵdarlamada baq synaıdy.
Búgin Qazaqstan boksshylarynyń ishinen sharshy alańǵa birinshi bolyp Jánibek Álimhanuly shyǵady. Jánibektiń qarsylasy ırlandııalyq Maıkl O'Rellı. Ekinshi bolyp sharshy alańǵa jerlesterimizden Vasılıı Levıt shyǵady. Onyń qarsylasy ýkraınalyq Gevorg Manýkıan.
Al keshki sessııada tórt boksshymyz óz baqtaryn synaıdy. Onda 52 kelidegi Oljas Sáttibaev qytaı boksshysy Tszıangýan Hýmen judyryqtasady. 69 keli salmaqta álem chempıony, Azııa oıyndarynyń eki dúrkin jeńimpazy Danııar Eleýsinov fılıppındik Eýmır Marsıalmen qolǵap túıistiredi. Taǵy bir júldeden basty úmitker azamatymyz Ádilbek Nııazymbetov ózbekstandyq Elshod Rasýlovpen jekpe-jekke shyǵady.
Al asa aýyr salmaqtaǵy Ivan Dychko nemis boksshysymen jartylaı fınal joldamasyn sarapqa salady. Búgin de jerlesterimizge jeńis tileımiz.
Al tómende Shırek fınalǵa ár salmaqtan segiz, ıaǵnı, 80 boksshy shyqty. Shırek fınalǵa shyqqan boksshylar sany Kýba - 9; Ázerbaıjan, Ózbekstan - 7; Qazaqstan - 6; Reseı - 5; Ulybrıtanııa, Irlandııa - 4; Ýkraına - 3; Fılıppın, Mońǵolııa, Taıland, Úndistan, Belarýs, Gollandııa, Qytaı, Frantsııa, Horvatııa - 2; Polsha, Katar, Armenııa, Túrkııa, Ekvador, Egıpet, Argentına, Italııa, Pýerto-Rıka, Kolýmbııa, Germanııa, Iordanııa, Aljır, Kosta-Rıka, Brazılııa, Lıtva, Marokko boksshylarynan bir-birden ǵana boksshylar shırek fınalǵa ótti.
Kúnsultan Otarbaı
