BOKS: Bernard Hopkıns sózinde turdy, bıyl kúzde jartylaı aýyr salmaqta álemniń absolıýtti chempıony anyqtalady
ALMATY. QazAqparat- Jartylaı aýyr salmaqta IBF ı WBA nusqalary boıynsha álem chempıony, 49 jastaǵy amerıkalyq boksshy Bernard Hopkıns pen WBO chempıony 31 jastaǵy reseılik Sergeı Kovalev arasynda biriktirýshi jekpe-jek ótkizý týraly kelisim-shartqa qol qoıyldy.
Bul jaıynda Main Events promoýterlik kompanııasynyń basshysy Ketı Dýva men Halyqaralyq boks federatsııasy (IBF) resmı túrde jarııalady, dep jazady allboxing.ru saıty.
Jekpe-jekti ústimizdegi jyldyń qarasha aıynda ótkizý josparlanǵan jáne ony HBO telearnasy taratatyn bolady. Biraq, boks jankúıerleri asyǵa kútken bul kezdesý júzege asýy úshin Sergeı Kovalev búgin Atlantık-Sıtı (Nıý-Djersı shtaty, AQSh) qalasynda ótetin boks keshinde buǵan deıin jeńilistiń aşy dámin tatyp kórmegen 27 jastaǵy avstralııalyq boksshy Bleık Kaparellony qalaıda jeńýi tıis.
Aıta ketelik, reseılik boksshy da kásibı rıngte birde-bir ret jeńilip kórgen emes. Ol barlyǵy 25 kezdesý ótkizgen. Olardyń 24-inde jeńiske jetip, bir kezdesýdi teń aıaqtaǵan. 22 kezdesýde qarsylasyn nokaýtpen jeńgenin aıta ketken jón. Osylaısha Sergeı Kovalev qazirgi tańda álemdegi soqqysy joıqyn nokaýterlerdiń biri bolyp sanalady.
Al bokstan álemniń eń jasy úlken chempıony 49 jastaǵy Bernard Hopkıns óz sózinde turdy deýge bolady. Óıtkeni ol osydan eki apta buryn RingTV portalyna bergen suhbatynda:
«Men kelisim-shartqa birinshi bolyp qol qoıǵan jigitpen shyǵamyn. Men osy eki jigittiń birimen (Olar Adonıs Stıvenson men Sergeı Kovalev) jekpe-jekke shyqqym keledi. Armanym bıylǵy jyldyń sońyna deıin álemniń absolıýtti chempıony bolý!» - degen bolatyn.
Aıta ketelik, Bernard Hopkıns 2015 jyldyń 15 qańtarynda 50 jasqa tolady.
Ol bıyl 20 sáýirde WBA chempıony 30 jastaǵy qazaqstandyq boksshy Beıbit Shúmenovty jeńip, IBF nusqasyna osy WBA nusqasyn da qosyp alǵan bolatyn.
