Boks: Bekzat Nurdáýletov Olımpıadaǵa irikteý týrnırin jeńispen bastady

NUR-SULTAN. QazAqparat – Búgin Iordanııanyń Amman qalasynda ótip jatqan bokstan Olımpıadaǵa irikteý týrnırinde 81 keli salmaqta Bekzat Nurdáýletov sharshy alańǵa shyqty, dep habarlaıdy QazAqparat tilshisi.

Ol alǵashqy aıqasyn Jańa Zelandııa ókili Jerom Pompellonege qarsy ótkizdi. Asa tartysty jekpe-jekte iń qorytyndysynda tóreshiler jeńisti qazaqstandyq boksshyǵa berdi.

Osylaısha, Ǵalymbek Kenjebaev baptap, bastap barǵan segiz boksshynyń ekeýi alǵashqy aıqastaryn jeńispen aıaqtap, kelesi aınalymǵa ótti.

Osyǵan deıin 63 keli salmaqta Zákir Safıýllın sharshy alańǵa shyǵyp, alǵashqy jekpe-jeginde jeńiske jetkeni týraly jazǵan bolatynbyz.

Aıta keteıik, Bekzat Nurdáýletov ótken jyldyń qyrkúıek aıynda Reseıdiń Ekaterınbýrg qalasynda bokstan ótken álem chempıonatynda jasyndaı jarqyrap, jeńis tuǵyrynyń eń bıik satysynan kóringen bolatyn.

Onda ol jartylaı fınalda 81 kelige deıingi salmaq dárejesinde tóreshilerdiń sheshimimen tórt dúrkin álem chempıony jáne Rıo-2016 Olımpıada chempıony kýbalyq Hýlıo Sesar la Krýstan basym tústi. Tipti, ekinshi raýndta Nurdáýletov qarsylasyn nokdaýnǵa jibergeni de esimizde.

Sondaı-aq, búgin keshki sessııada taǵy bir boksshymyz 75 keli salmaqta Ábilhan Amanqul Olımpıada joldamasyna talasty bastaıdy.