Boks: Bas bapker Olımpıadaǵa qalaı daıyndalyp jatqanyn aıtty

ASTANA. KAZINFORM – Bokstan Qazaqstan Ulttyq quramasy Olımpıada oıyndaryna Túrkistan oblysyndaǵy «Alma taý» bazasynda Ózbekstan, Kýba, Qyrǵyzstan, Tájikstan jáne Túrkimenstan elderimen birlesken oqý-jattyǵý jıynyn ótkizip jatyr.

Bul týraly KAZINFORM tilshisine Bokstan Ulttyq quramanyń bas bapkeri myrzaǵalı Aıtjanov aıtyp berdi.

«Biz búgingi tańda Túrkistan oblysyndaǵy «Alma taý» bazasynda ózge el boksshylarymen birikken oqý-jattyǵý jıyndaryn ótkizip jatyrmyz. Qatarymyzda Olımpıadaǵa joldama jeńip alǵany da, joldamaǵa endi talasatyny da bar. Ózge elderden Ózbekstan, Kýba, Qyrǵyzstan, Tájikstan jáne Túrkimenstan boksshylary keldi», - dedi bas bapker Aıtjanov.

Aıtjanov Olımpıada oıyndarynyń qarsańynda osyndaı birikken oqý-jattyǵý jıynadaryn kóptep ótkizý boksshylardyń tájirıbesin jetildirýge, sheberlikterin shyńdaýǵa úlken septigin tıgizetinin atap ótti.

«Bizdiń oqý jıynymyzǵa Tájikstannan 92 keli salmaqta Olımpıadaǵa lıtsenzııa jeńip alǵan boksshy arnaıy keldi. Túrkimen men Qyrǵyzdyń endi lıtsenzııaǵa talasatyn boksshylary keldi. Ózbekstan men Kýbadan Olımpıada joldamasyn jeńip alǵan tórt-tórtten 8 boksshy kelse, Izraıldan bir boksshy arnaıy lıtsenzııalyq týrnırge daıyndalý úshin bizdiń eldi tańdapty. Bul bizdiń boksshylarǵa úlken demeý bolary anyq. Sebebi, ózge boksshylarmen sparnıg kezdesýler ótkizý bizdiń bylǵary qolǵap sheberleriniń múmkindigin shyńdaýǵa, tájirıbelerin jetildirýge úlken septigin tıgizedi. Birlesken jattyǵý jıyny 21 sáýirge deıin jalǵasady», - dedi Myrzaǵalı Aıtjanov. 

Esterińizge sala ketsek, bokstan erler quramasy Parıj Olımpıadasyna 6 joldama jeńip alǵan.

Endi Taılandtaǵy sońǵy lıtsenzııalyq jarysqa Muhammedsabyr Bazarbaıuly barady.

Aıta ketsek, Grekııanyń Olımpııa qalasynda 2024 jyly Parıjde ótetin Olımpıada oıyndarynyń alaýy resmı túrde tutandy.