Boks: Bas bapker Ábilhan Amanquldyń jaraqaty týraly pikir bildirdi

NUR-SULTAN. QazAqparat – Tokıo Olımpıadasynda 75 keli salmaqta Qazaqstannyń namysyn qorǵaıtyn Ábilhan Amanquldyń eski jaraqaty taǵy syr bermeı me? Bokstan Qazaqstan erler quramasynyń bas bapkeri Ǵalymbek Kenjebaevqa BAQ ókilderi Zoom arqyly ótken tikeleı baılanysta osyndaı suraq qoıdy, dep habarlaıdy QazAqparat tilshisi.

«Ábilhan Amanquldyń jaraqaty bolǵany ras. Biraq emdeldi. Sankt-Peterbýrgtegi jarysta jaraqat alyp, biz ony ári qaraı shyǵarǵan joqpyz. Osy Olıpıadaǵa jaqsy daıyndalýy kerek boldy. Odan keıin Azııa chempıonatynda jaqsy oınap shyqty. Qoly syr bergen joq. Ol jaraqaty qazir mazalap júrgen joq. Jekpe-jekterden keıin qalaı bolatynyn kóremiz. Negizi daıyndyǵy jaqsy», - dedi bapker.

Ǵalymbek Kenjebaev «Qazaqstannyń salmaǵy» atanyp ketken 69 kelide baq synaıtyn Abylaıhan Júsipovtiń daıyndyǵy týraly da aıtty.

«69 kelini Qazaqstannyń salmaǵy dep bári aıtyp júr ǵoı. Ol salmaq negizi Qazaqstanda paıda bolǵan joq, Qazaqstandiki dep aıtatyndaı. Óıtkeni Olımpıada bálen jyldan beri ótip kele jatyr. Iá, sońǵy Olımpıadalarda osy salmaqtan altyn medal alyp júrmiz. Sol dástúrdi jalǵastyrsaq degen úmit bar bárimizde. Qazir Abylaıhannyń deni saý, bári jaqsy, daıyndyǵy jaman emes. Birinshi jekpe-jegi ótsin. Ári qaraı kóre jatarmyz. Bıylǵy 69 kelini óte myqty salmaq dep aıtýǵa bolady. Ózderińiz de kórip otyrsyzdar. Kýbanyń myqty boksshysy bar, Anglııanyń boksshysy da osal emes, álem chemıpony Zamkovoı bar. Rıoda kúmis medal alǵan boksshy Ázerbaıjan atynan shyǵyp jatyr. Solardyń bári 69 kelini báseke óte myqty salmaq etip tur. Biraq Abylaıhan da olardan osal emes», - dedi bas bapker.