Boks bapkerlerin attestatsııadan ótkizý kerek - Qazaqstannyń boks federatsııasy
ASTANA. QazAqparat - Qazaqstannyń boks federatsııasynyń vıtse-prezıdenti ıÝrıı Tsxaıdyń aıtýynsha, elimizde boks mamandaryn daıarlaıtyn oqý oryndar men arnaıy kýrstar bolmasa da, árbir bapker tóreshilerdi synaı bermeı, óziniń kásibı sheberligin shyńdap otyrýy qajet. Sonda sportshylar da ósedi. Qazaqstan bolsa, úzdik úshtiktiń bıigine shyǵa alady, dep xabarlaıdy QazAqparat tilshisi.
«Birinshiden, oqý-jattyǵý jıyndary kezinde bapkerlerdiń de kásibı sheberligin ushtap otyrǵan jón. Oǵan arnaıy mamandardy tartýǵa bolady. Al osy jumystyń sońynda attestatsııa ótkizip, úzdik bapkerlerdi iriktep alý qajet. Dál sol azamattar ulttyq quramaǵa tartylýy tıis», - dedi federatsııanyń bapkerler shtabymen jumys jónindegi vıtse-prezıdenti ıÝrıı Tsxaı búgin uıymnyń jyl saıynǵy konferentsııasynda.
Onyń oıynsha, myqty boksshylarda jeke daıyndyq jospary bolýy shart. Al oqý-jattyǵý jıyndarynyń bir bóligin shet elde ótkizýge bolady. «Bul jumysqa sheteldik mamandardy tartý qajet. Sonda bapkerler de, sportshylar da ósedi. Gambýrgta ótken Álem chempıonatynda biz jaqsy óner kórsettik. Degenmen, burynǵy mejeden asa almadyq. Ashyǵyn aıtaıyn, bir deńgeıden shyǵa almaı, toqtap qaldyq. Bapkerler óz daıyndyqtaryn shyńdamaıdy. Sodan jaǵdaıymyz da ózgermeıdi. Úshtikke iliný bir basqa, sol úshtiktiń aldyńǵy shebine shyǵý qajet. Al bapkerlerdiń daıyndyǵy kóterilse, sportshylar da óse túsedi», - dep atap kórsetti Tsxaı.
Vıtse-prezıdenttiń aıtýynsha, bapkerler qıt etse, bárin tóreshilikke, ıa bolmasa, federatsııaǵa jaba salady. Búginde boks úshin barlyq jaǵdaılar jasalyp jatyr. Sonyń bárin paıdalaný qajet. «Men bizdiń bapkerlerimizdi qatty syılaımyn. Biraq sizder keshegi kúnmen ómir súrip jatyrsyzdar. Men rıngke birtýma boksshylardy kórgim keledi. Ártistiń artynan qalaı júgirse, barlyǵy sonyń artynan da solaı júgirse eken deımin. Osyny jasaýǵa daıyn bolsańyzdar, birge jumys isteıik. Al daıyn bolmasańyzdar, basqalarǵa jol bereıik», - dedi ıÝrıı Tsxaı.
Sondaı-aq, osy jıynda Qazaqstandaǵy boks erejelerine birqatar ózgerister engizilgeni jarııa etildi.
