Boks: B. Shúmenov pen G. Kampılo arasyndaǵy jekpe-jektiń ótkiziletin merzimi anyqtaldy
ASTANA. Qańtardyń 10-y. QazAqparat /Ernur Aqanbaı/ - Kásipqoı boksshylar qazaqstandyq Beıbit Shúmenov pen WBA nusqasy boıynsha jartylaı aýyr salmaqtaǵy álem chempıony ıspandyq Gabrıel Kampılo arasyndaǵy jekpe-jektiń ótkiziletin datasy jáne orny anyqtaldy,
dep habarlaıdy QazAqparat.
«Bizdiń sport» saıtynyń málimetinshe, WBA nusqasy boıynsha jartylaı aýyr salmaqtaǵy álem chempıony ataǵy úshin ese qaıtarý matchyn qańtardyń 29-ynda AQSh-tyń Nevada shtatyndaǵy Las-Vegas qalasynda ótkizý josparlanyp otyr. Aıta keteıik, atalmysh boksshylar arasyndaǵy birinshi jekpe-jek 2009 jylǵy tamyzdyń 15-inde Astanada ótken bolatyn. Onda qazirgi chempıon G. Kampılo tóreshiler daýsynyń basymdyǵymen upaı sany boıynsha jeńiske jetken-di. Alaıda, B. Shúmenov qarsylasyn dopıng-synamany ótkizý protsedýrasynda buzýshylyqtarǵa jol bergenin negizge alyp, appelıatsııa bergen bolatyn. Endi, mine boksshylar sharshy alańǵa taǵy da shyǵyp, shyn myqtynyń kim ekenin qaıtadan anyqtamaq.
