BOKS: Azııa chempıonatynyń fınalyna bes boksshymyz shyqty
ASTANA. QazAqparat - Bes qazaqstandyq boksshymyz Bangkoktaǵy Azııa birinshiliginiń fınalyna shyqty, dep habarlady Sports.kz.
Boksshy Oljas Sáttibaev Bangkokta ótip jatqan jarysta aqtyq synǵa joldama alǵan alǵashqy qazaqstandyq boldy.
Qarsylasy qyrǵyz ókili Azat Ýsenalıevpen (salmaq dárejesi - 52 kelige deıin) kezdeskende barlyq tóreshiler qazaqstandyqty jeńis tuǵyryna shyǵardy. Esep 3:0 (30:27, 30:27, 30:27).
81 keli salmaq dárejege deıin óner kórsetetin Ádilbek Nııazymbetov jartylaı fınalda ırandyq Hassan Shahınımen kezdesti.
Ádilbek 3:0 (30:27, 30:27, 30:26) esebimen jeńip fınalǵa shyqty.
Danııar Eleýsinovtiń qarsylasy mońǵol Tývshınbat Bıamba osal bolmady. Alaıda jerlesimizdiń kúshi basym tústi. Esep 3:0.
60 kelige deıingi salmaq dárejesinde japonııalyq Daısýke Narımatsýdi jeńgen Zákir Safıýllın aqtyq synǵa joldama aldy.
Jartylaı fınalda aýyr salmaqta óner kórsetetin Ivan Dychko Hýsseın ıAshaıshten basym tústi. Esep 3:0 (30:26, 30:26, 30:25).
