Boks: Azııa chempıonatynda áıelderden kimder judyryqtasady

NUR-SULTAN. QazAqparat - Bokstan áıelder komandasynyń bas bapkeri Vadım Prısıajnıýk Azııa birinshiligine qatysatyn sportshylar tizimin jarııalady, dep habarlaıdy QazAqparat tilshisi.

QR Boks federatsııasy taratqan málimet kózderine súıensek, 16-26 sáýir aralyǵynda Taıland astanasy Bangkokte ótetin qurlyq dodasyna Qazaqstan tolyq qurammen qatysady.

Aıta keterligi bıyl alǵash ret Azııa birinshiligi erler men áıelder arasynda bir ýaqytta uıymdastyrylmaqshy.

Chempıonatta áıelderden 48 keli salmaqta Alýa Balqybekova, 51 keli salmaq dárejesinde Nazym Qyzaıbaı, 54 kelide Dına Jolaman sharshy alańǵa shyqsa, 57 kelide Sánııa Sultanqyzy, 60 kelide Rımma Volosenko, 64 keli salmaqta Mılana Safronova, 69 kelide Darıǵa Shákimova baq synaıdy.

75 keli salmaqta Aqerke Baqytjan el namysyn qorǵasa, 81 kelide Farıza Sholtaı jekpe-jekke shyǵady. Al asa aýyr salmaq dárejesinde (+81 keli) Lázzat Kúngeıbaevaǵa úmit artylyp otyr.

Esterińizge sala keteıik, osyǵan deıin erler arasynda Azııa chempıonatynda el namysyn qorǵaıtyn on boksshynyń tizimin jarııalaǵan bolatynbyz.