BOKS: Áıelder arasynda ótetin Azııa birinshiliginde bes júldege qol jetkizsek degen úmitimiz bar - Q. Manashev
ALMATY. QazAqparat- Bokstan Qazaqstannyń áıelder quramasy Azııa chempıonatyna daıyndalý maqsatynda Almaty mańyndaǵy «Taý samaly» sport bazasynda Ázerbaıjan quramasymen birlesken oqý-jattyǵý jıynyn ótkizedi. Bul týraly QazAqparat tilshisine bokstan áıelder quramasynyń bapkeri Qaırat Manashev málimdedi.
Onyń aıtýynsha, jalpy dene jattyǵýy jáne arnaıy daıyndyq boıynsha jıyn qańtar aıynyń 25-nen 14-shi aqpanǵa deıin jalǵasady.
«Azııa birinshiligine ulttyq qurama sapynda 10 boksshymyz qatysady. Bizdiń basty qarsylastarymyz ádettegideı - Qytaı, Ońtústik Koreıa jáne Úndistan qurama komandalary. Bul boks dodasynda bes júldege qol jetkizsek degen úmitimiz bar. Sáıkesinshe, ulttyq quramanyń beldi boksshylary Nazym Qyzaıbaı, Lázzat Kúngeıbaı, Darıǵa Shákimova, Dına Jolaman jáne Zarına Tsoloevaǵa úlken úmit artamyz» - dedi bokstan Qazaqstannyń áıelder quramasynyń bapkeri Qaırat Manashev.
Azııa chempıonaty ústimizdegi jyly mamyr aıynyń ekinshi jartysynda Qytaıdyń Іshki Mońǵolııa aýmaǵynda ótkiziledi. Naqty qaı qalada ótetindigi ázirge anyqtalǵan joq. Azııa birinshiliginen keıin, boksshy qyzdarymyz Polsha, Qyrǵyzstan, Bolgarııa jáne Reseıde ótetin týrnırlerge qatysady.
Aıta ketelik, aldaǵy jyly Astana qalasynda áıelder arasynda Álem chempıonaty ótedi.
