Boks: áıelder arasynda álem chempıonatyna baratyn Qazaqstan quramasy belgili boldy
Qazaqstan ulttyq olımpıada komıtetiniń saıtynan alynǵan málimetke qaraǵanda, bokstan áıelder quramasynyń bas bapkeri Vadım Prısıajnıýk olardyń esimderin jarııa etti.
El quramasyna Áıgerim Qasenaeva (48 kg), Jaına Shekerbekova (51 kg), Dına Jolaman (54 kg), Nazym Işanova (57 kg), Karına Ibragımova (60 kg), Mılana Safronova (64 kg), Aqerke Baqytjan (69 kg), Aıda Ońdash (75 kg), Farıza Sholtaı (81 kg) jáne Lázzat Kúngeıbaeva (81 kg joǵary) kirdi.
Qazaqstandyq boksshylar Indonezııadaǵy Azııa oıyndarynda oıdaǵydaı óner kórsete almaǵany belgili.
«Sondyqtan Azııa oıyndarynda 51, 57 jáne 60 kelide el namysyn qorǵaǵan Nazym Qyzaıbaı, Sánııa Sultanqyzy jáne Rımma Volosenko álem chempıonatynda judyryqtaspaıdy degen sheshim qabyldadyq. Jalpy, biz bir jyl ishinde jáne qorytyndy sparrıngterde sportshylardyń óner kórsetýlerin baqylap, irikteý júrgizdik. Mysaly, Karına Ibragımova (60 keli) týrnırlerde ózin jaqsy qyrynan kórsetti. Al Darıǵa Shákimova (75 keli) bıylǵy dúnıejúzilik dodaǵa qatyspaıdy. Sebebi, ol Almatydaǵy jattyǵý jıynynda tizeden aýyr jaraqat aldy. Osy salmaq dárejesinde Qazaqstan atynan Aıda Ońdash barady», dedi V.Prısıajnıýk.
Bas bapkerdiń sózine qaraǵanda, 1-21 qazan aralyǵynda Almatyda oqý-jattyǵý jıyndary ótken. Qazirgi kezde boksshylar Astanada jattyǵýda. 12 qarasha kúni qurama Úndistanǵa bet alady.
«Álem chempıonatyndaǵy negizgi qarsylastarymyz retinde Azııa elderi, Reseı jáne AQSh-tan keletin boksshylardy aıtýǵa bolady. Degenmen qazirgi kezde boksta básekelestik joǵary, sondyqtan basqalarmen de eseptesteýge bolmaıdy. Basty maqsat - kóbirek júldege qol jetkizý», dep túıdi oıyn Vadım Prısıajnıýk.