BOKS: «Astana arlandary»-«Rashn Boksın Tım»: 5:0
ASTANA. QazAqparat - Elordadaǵy «Dáýlet» sport kesheninde ótken Búkilálemdik boks serııasy (WSB) jobasynyń besinshi maýsymynyń jartylaı fınalynyń búgingi sońǵy kezdesýi «Astana arlandarynyń» boksshysy Vasılıı Levıt pen Reseıdiń «Rashn Boksın Tım» komandasynyń múshesi Vıtalıı Kýdýhov arasynda órbidi.
Kezdesý barynsha tartysty ótti. Vıtalıı baryn saldy. Bastapqy eki raýndta ol basymdyǵyn tanytty. Úshinshi raýndta da bar kúshin aıamady. Osy kezeńde qazaqstandyq qarsylasyn shyntaǵymen qaǵyp jibergen reseılik rıng tóreshisinen eskertý alǵan edi. Dál osyndaı keleńsiz jaıt tórtinshi raýndta taǵy qaıtalandy. Osydan keıin tóreshi jekpe-jekti toqtatyp, jeńisti Qazaqstan boksshysyna berdi.
Aıta keteıik, eki komanda arasyndaǵy qalǵan 5 jup salmaq sanatyndaǵy boksshylardyń jekpe-jegi erteń elordadaǵy «Dáýlet» sport kesheninde ótedi. Sol kúni sharshy alańda Oljas Sáttibaev pen Karen Arýtıýnıan (52 keli), Zakır Safıýllın men Artýr Sýbhankýlov (60 keli), Nurdáýlet Jarmanov pen Edýard ıAkýshev (81 keli), Erkin Muhamedjan men Dmıtrıı Zaıtsev (91 keliden joǵary) aıqasatyn bolady. Al 69 keli salmaq sanatynda el namysyn Aslanbek Shymbergenov qorǵap, reseılik ıAkýb Nýrıevpen judyryq túıistirýi tıis edi. Biraq jattyqtyrýshylar onyń ornyna Danııar Eleýsinovti shyǵarý týraly sheshim qabyldady.
