Boks: «Astana arlandary» «Máskeýlik Dınamony» jeńdi
ASTANA. 25 naýryz. QazAqparat - Naýryzdyń 23-i kúni Astanadaǵy «Dáýlet» sport kesheninde Búkilálemdik boks serııasy aıasyndaǵy jartylaı fınaldyq jekpe-jekterdiń alǵashqy kezdesýin «Máskeýlik Dınamo» boksshylarymen ótkizgen «Astana
arlandary» 3:2 esebimen jeńiske jetti.
Týrnırdiń alǵashqy jekpe-jegi 54 keli salmaq dárejesinen bastaldy. Bul kezdesýde arlandyq Meıirjan Rahymjanov óz qarsylasy - Vladımır Nıkıtınniń tastaı qorǵanysyn qansha buzýǵa tyryssa da, aılasyn asyra almady. Esep 0:1. Ekinshi jekpe-jek «Astana arlandary» komandasynyń maqtanyshy - Mereı Aqshalov pen dınamolyq Vazgen Safarıants (60 keli) arasynda ótti. Negizi, M.Aqshalov áli birde-bir ret jeńilip kórgen emes. Osy joly da ol bul dástúrden jańylǵan joq. V.Safarıants birneshe ret ereje buzyp, M.Aqshalovty baspen urdy. Qasy men qabaǵyn jaryp jiberdi. Al jeńilgennen keıin, qarsylystyń qolyn almaýy jigittikke múldem jatpaıtyny ras. M.Aqshalov bolsa, dınamolyq boksshysynyń osyndaı ersi qylyqtaryna eshbir kóńil aýdarmaı, naǵyz sheberlikti tanyta bildi. Esep teńesti. Mıras Baıyrhanov ta namysty qoldan bermedi. Úshinshi jekpe-jekte ol dınamolyq Vıtalıı Bandarenkony jeńdi. Al 85 keli salmaqta «Dınamonyń» kóshbasshysy - Danıl Shvedten basym túsken Ramzjon Ahmedov arlandyqtardyń jeńisin eseledi. Esep 3:1. Sońǵy asa aýyr salmaq dárejesinde Rýslan Myrsataev týrnırdiń jalpy esebin 4:1-ge deıin jetkizetin edi. Biraq dınamolyq Sergeı Kalchýgın eki-aq upaımen Rýslannan basym túsip, jeńiske jetti. Negizi, bul jekpe-jek kezindegi Rýslannyń qyzýqandy minez tanytyp, ereje buzǵanyn túsinýge bolady. «Máskeýlik Dınamo» boksshylarynyń keıbir áreketterine qany qaınaǵan Rýslan birneshe eskertý alyp, bir upaıyn qarsylasyna berýge májbúr boldy.
Sonymen, jartylaı fınaldaǵy alǵashqy kezdesýde «Astana arlandary» «Máskeýlik Dınamony» 3:2 esebimen jeńdi. Endi, naýryzdyń 30-y kúni Máskeý qalasynda eseptik jekpe-jekter ótedi.
