Boks: «Astana arlandary» kezdesýge tolyq daıyn
ASTANA. 12 sáýir. QazAqparat - Erteń, 13 sáýir Astana ýaqyty boıynsha tańǵy saǵat 8-de Mehıkoda «Astana arlandary» jergilikti boksshylarmen WSB dodasynyń jartylaı fınalyndaǵy alǵashqy kezdesýin ótkizedi. Match álemdegi úlkendigi jaǵynan ekinshi alań sanalatyn «Konstıtýtsııa alańynda» ótedi. Bul týraly «Alaman» habarlady.
Ońtústik Amerıka qurlyǵyna sapar shekken «Astana arlandary» Mehıkoda «Meksıka qorazdarymen» kúsh synasady. 50 keli salmaqta qazaqstandyq komanda sapynda Meıirbolat Toıtov óner kórsetedi. Ol Elıas Emıgdomen qolǵap túıistiredi.
61 keli salmaqta Erjan Músápirovke senim artyldy. WSB dodasynyń alǵashqy maýsymynda óte jaqsy judyryqtasqan qandasymyzdyń sońǵy jyldary joly bolmaı júr. Desek te, bul jolǵy básekede ol jergilikti bylǵary qolǵap sheberi Hýan Romerony utatynyna senimimiz zor. 73 keli salmaqta Ábýázıt Úgirshıev ortaǵa shyǵady. Jerlesimiz úshin bul - atalmysh jobadaǵy alǵashqy jekpe-jek. Sondyqtan da ol senimge selkeý túsirmeýge tıis. Ábýázıttiń qarsylasy - Marıýn Kabrerra. 85 keli salmaq dárejesinde Hrjove Sep óz ónerin ortaǵa salady. «Astana arlandary» sapyndaǵy horvatııalyq legıoner Mehıkoda Issak Mýnostyń qarym-qabiletin baıqap kórmek. Asa aýyr salmaqtaǵy báseke Fılıpp Hrgovıch pen Heraldo Bıspal arasynda ótedi.
Ekinshi jartylaı fınalda «Mılan naızaǵaılary» men «Ýkraına atamandary» sheberlik baıqasady. Jartylaı fınaldyq qarymta kezdesýler 20 sáýir kúni uıymdastyrylady.
