BOKS: «Astana arlandary» «Baký Faırs»-ty basymdyqpen jeńip, WSB tobynda kósh bastady
ASTANA. QazAqparat - Búgin «Astana arlandarynyń» bylǵary qolǵap sheberleri «Baký Faırs» klýbynyń boksshylaryn 4:1 esebimen jeńdi.
Shymkent qalasynda ótken tartysty kezdesýdi «WSB TV» saıty onlaın-rejımde kórsetti.
Birinshi bolyp alańǵa shyqqan qazaqstandyq boksshy Oljas Sáttibaev óz qarsylasy ázerbaıjandyq Murad Rabadanovty aıqyn jeńip, 52 keli salmaqta kim myqty ekenin dáleldep berdi. Bul kezdesýdiń qorytyndy esebi: 3:0 (50:45, 50:45, 50:45).
Kelesi kezekte 60 kelige deıingi salmaq boıynsha áıgili Albert Selımovpen judyryqtasqan Zakır Safıýlın qarsylasyna ese jiberdi desek te, jankúıerleriniń úlken qoshemetine bólendi. Tóreshiler bul kezdesýde 0:3 (47:48, 46:49, 47:48) degen eseppen Selımov basym túskenin kórsetti.
Budan keıin sharshy alańǵa 81 kelige deıingi salmaqtaǵy Hrvoe Sep - Mıhaıl Dolgolevetstiń juby shyqty. Qazaqstandyq jankúıerdiń yqylasyna bólenip júrgen horvatııalyq Hrvoe Sep bul joly da qarsylasyn qýyp júrip sabady. Besinshi raýndta Mıhaıl Dolgolevetsti nokdaýnǵa jiberdi. Esep: 3:0 (50:44, 50:44, 50:44).
Osy kezdesýden keıin 69 kelige deıingi salmaqta Qanaǵat Maralov pen Parvız Bagırov arasynda tartysty jekpe-jek ótti. Bes raýndaǵy nátıje boıynsha 2:1 (46:49, 49:46, 48:47) esebimen Qanaǵat jeńiske jetti.
Al asa aýyr (91 keli) salmaq boıynsha sharshy alańǵa shyqqan Fılıpp Hrgovıch pen Gadjı Murtazalıev arasyndaǵy kezdesý bar bolǵany bir raýndqa sozyldy. Tehnıkalyq nokdaýnmen jeńgen Fılıpp Hrgovıch Ulystyń uly kúni qarsańynda ótken kezdesýdiń núktesin qoıdy.
Aıta ketý kerek, Ázerbaıjan elinde ótken kezdesýde de 3:2 esebimen «Astana arlandary» basym túsken bolatyn.
Sóıtip, osy maýsymda on kezdesýdiń onyn da jeńispen aıaqtaǵan «Astana arlandary» klýby Búkilálemdik boks serııasynyń (WSB) «B» tobynda kósh bastap keledi.
Búgingi boks keshiniń jazylyp alynǵan nusqasyn «Habar» telearnasy búgin saǵat 22:30-da kórsetedi.
