Boks: Artýr Abraham kásipqoı boksshylar arasynda álem chempıony tıtýlyn qaıtaryp aldy
ASTANA. QazAqparat - Germanııanyń sportshysy Artýr Abraham Dúnıejúzilik boks uıymynyń nusqasy boıynsha 76,3 kelige deıingi salmaq sanatynda álem chempıony tıtýlyn qaıtaryp aldy.
Nemistiń Magdebýrg qalasynda ótken 12 raýndtyq tıtýldy jekpe-jekte ol upaı sany boıynsha otandasy Robert Shtıglıtsti jeńdi.
Kezdesý qorytyndysy boıynsha tóreshilerdiń bireýi jeńisti Shtıglıtske berse, qalǵan ekeýi Abrahamnyń biliktiligin joǵary baǵalady.
Boksshylar osymen úshinshi ret qolǵap túıistirdi. 2012 jylǵy tamyzda Abraham upaı sany boıynsha qarsylasynan tıtýldy tartyp alsa, byltyrǵy naýryzda Shtıglıts 4 raýdta tehnıkalyq nokaýtpen esesin qaıtarǵan edi.
Sporttyq mansabynda Abraham 39 márte (28-i nokaýt) jeńiske jetip, 4 ret utyldy, al Shtıglıts 46 ret (26-sy nokaýt) jeńis tuǵyrynan kórinse, 4 márte jeńilis tapty.
