BOKS: «Arlandar» jeńisti joldan jańylǵan joq
ASTANA. 24 qarasha. QazAqparat - «Astana arlandary» WSB dodasynyń tórtinshi maýsymyndaǵy ekinshi kezdesýin ótkizip, taǵy da jeńiske jetti.
Peterbor qalasynda ótken «Reseı quramasymen» match 3:2 esebimen bizdiń paıdamyzǵa sheshildi, dep habarlaıdy «Alaman».
Aldymen 52 kelide Mısha Aloıan men Oljas Sáttibaev sharshy alańǵa shyqty. Úsh raýnd boıy Oljas qarsylasyna soqqy jasaýǵa tyrysqanymen Aloıan tájirıbesiniń arqasynda qarsylasynan basym boldy. Esepti Reseı quramasy ashty.
Artynsha, 60 kelide komanda kapıtany Samat Bashenov Adlan Abdýrashıtovty jeńdi - 2:1 (48:47, 48:47, 47:48).
Keıin 69 kelide Meıirim Nursultanov Aleksandr Ivanovty sabady - 3:0 (49:45, 49:46, 50:45).
75 kelide London Olımpıadasyna qatysýshy Danabek Sýjanov Dmıtrıı Bıvoldan tehnıkalyq nokaýtpen utylyp qaldy. Esep - 2:2.
Al sońǵy sheshýshi kezdesýde asa aýyr salmaqta horvatııalyq legıoner Fılıpp Hrkovıch reseılik Sergeı Kýzmınnen basym tústi - 3:0 (49:46, 48:47, 49:46).
Esterińizge sala keteıik, «Arlandar» alǵashqy kezdesýde Almatyda «Baký ottaryn» jeńgen bolatyn. Endi bizdiń komanda 9 jeltoqsanda Meksıka boksshylarymen kezdesedi.
