Boks Argentınadaǵy jasóspirimderdiń olımpıada oıyndary baǵdarlamasynda qaldyryldy
ASTANA. QazAqparat - Halyqaralyq olımpıada komıteti boksty Argentınadaǵy Jasóspirimder olımpıada oıyndary baǵdarlamasynda qaldyrdy. Bul týraly Azııa boks federatsııasynyń baspasóz qyzmeti habarlady.
2018 jyly Jasóspirimder olımpıada oıyndary úshinshi ret ótkeli jatyr. Shara 6-18 qazan aralyǵynda Býenos-Aıresta uıymdastyrylmaq. Bul 14-18 jas aralyǵyndaǵy sportshylar qatysatyn arnaıy olımpıada oıyndary. Alǵashqy Jasóspirimder olımpıada oıyndary 2010 jyly Sıngapýrde ótken bolatyn.
«Shynynda, bul bokstan jastar quramasy úshin tabysty boldy. Lıtsenzııa týraly aıtar bolsaq, bizdiń el tolyq lıtsenzııalyq jınaqqa ıe. Bizdiń qurlyqtan Olımpıadaǵa 13, sonyń ishinde 9 erler jáne 4 áıelder lıtsenzııasy bólingen. Ótken Azııa chempıonatynyń qorytyndysy boıynsha, bul lıtsenzııaǵa Qazaqstan, Vetnam, Úndistan, Taıland, Ózbekstan memleketteriniń ıe bolǵanyn aıta alamyz», - dedi Serik Qonaqbaev.
Belgili bolǵandaı, Taılandta ótken jastar arasynda bokstan Azııa chempıonaty Qazaqstan úshin tabysty ótken. Bizdiń jas boksshylarymyz jalpy 10 altyn medal, onyń ishinde altaýyn bozbalalar men tórteýin boıjetkender jeńip aldy. Qurlyqaralyq birinshilikte Vengrııadaǵy álem chempıonaty men Argentınadaǵy Jasósipirimder olımpıada oıyndaryna lıtsenzııa oınatyldy.
«Sońǵy ýaqytta jas boksshylarymyzdyń Olımpıadaǵa qatysa ma, álde qatysa almaı qala ma degen ýaıym boldy. Sebebi Halyqaralyq Olımpıada komıtetiniń Býenos-Aırestaǵy Jasóspirimder oıyndary jáne 2020 jylǵy Tokıodaǵy Olımpıada baǵdarlamalarynda boksty qaldyrý nemese qaldyrmaý týraly naqty ustanymy bolmady. Keshe keshkisin Argentınadaǵy Olımpıada baǵdarlamasynda bokstyń qaldyrylǵandyǵy týraly jaqsy jańalyq aldyq. Japonııadaǵy Olımpıada oıyndary boıynsha ustanymdy HOK Atqarý komıteti keıinirek aıtady», - dep atap ótti Serik Qonaqbaev
