Boks: Alýa Balqybekova Astanadaǵy álem kýbogynyń altynyna talasady
ASTANA. KAZINFORM - Astanadaǵy World Boxing aıasynda ótip jatqan álem kýbogynda Qazaqstan quramasynyń sapynan Alýa Balqybekova (51 keli) fınalǵa berilgen jetinshi joldamaǵa ıe boldy.

Jartylaı fınaldyq aıqasta otandasymyz Karolın Barbosamen (Brazılııa) qolǵap túıistirdi. Úsh raýndtyń qorytyndysy boıynsha tóreshilerdiń sheshimimen Alýa jeńiske jetti.
Endi el quramasynan keshki sessııada Aıdana Zabynbekova (57 keli), Aıda Ábikeeva (65 keli), Nadejda Rıabets (75 keli), Mahmud Sabyrhan (55 keli), Ertýǵan Zeınýllınov (65 keli), Sabyrjan Aqqalyqov (75 keli), Aıbek Oralbaı (90 keliden joǵary) sharshy alańǵa shyǵady.
Aıta ketsek, qazirge deıin Nurbek Oralbaı (80 keli), Nazym Qyzaıbaı (48 keli), Vıktorııa Grafeeva (60 keli), Natalıa Bogdanova (70 keli), Sanjar Táshkenbaı (50 keli), Bekzad Nurdáýletov (85 keli) altyn júldege talasýǵa múmkindik aldy.