BOKS: Almatyda «Astana arlandary» argentınalyq «Argentina Condors» komandasyn 5:0 esebimen tize búktirdi
ALMATY. QazAqparat - Jańa ǵana Almatyda Balýan Sholaq atyndaǵy sport saraıynda Búkilálemdik boks serııasynyń V maýsymy aıasynda ótken boks dodasynda «Astana arlandary» kásipqoı boks klýby argentınalyq «Argentina Condors» komandasyn 5:0 esebimen tize búktirdi.
Bes saıys ta asa tartysty ótti. Jankúıerler sharshy alańǵa shyqqan árbir boksshymyzǵa qyzý qoldaý kórsetip otyrdy. Al «arlandyqtar» aıanyp qalmady.
Azamat Isaqulov (52 keli) - Rıkardo Ibarrany 3-0 (50:44, 50: 44, 50: 44), Roman Şegrınov (60 keli) Braıan Nýnesti 3-0 (50: 45, 50: 45, 49: 46), Danııar Eleýsinov (69 keli) Lýıs Verondy 3-0 (50: 45, 49: 46, 50: 45), horvatııalyq legıoner Hrvoe Sep (81 keli) Joze Olıveırany 3-0 (49:46, 50: 45, 49: 46) esebimen utsa, taǵy bir horvatııalyq legıoner Fılıpp Hrgovıch (91 keli) Karlos Ortegany ekinshi raýndta tehnıkalyq nokaýtpen jeńdi.
Azamat Isaqulov qarsylasyn besinshi raýndta nokdaýnǵa jiberdi.
Ásirese, Danııar Eleýsinov pen Lýıs Veron arasyndaǵy jekpe-jek shıelenisti ári taktıkalyq jaǵynan qyzyqty ótti. Danııar ádettegideı óziniń erekshe tásiline kóship, erkin qımyldap, qarsylasyn shyr kóbelek aınalyp, «bılep» júrip urys saldy. Qarsylasyna soqqy darytpaýdyń, sátti jerinde qarymta shabýyl jasaýdyń úlgisin kórsetti.
