Boks: Álemniń eks-chempıony jol apatynan qaza tapty
ASTANA. QazAqparat - Bokstan orta jáne jartylaı aýyr salmaqtaǵy burynǵy álem chempıony Gratsıano Rokkıdjanı 54 jasynda jol apatynan qaza tapty. Bul týraly Bild nemis basylymy jazdy, dep habarlaıdy QazAqparat.
Germanııanyń atynan kásibı rıngke shyqqan Rokkıdjanıdi Italııada tańerteńgi serýen kezinde kólik qaǵyp, mert qylǵan.
Gratsıano óz mansabynda 48 jekpe-jek ótkizip, 41 ret jeńiske jetken (sonyń ishinde 19-y nokaýtpen). Rokkıdjanı 2003 jyldyń mamyrynda nemis boksshysy Tomas Ýlrıhtan jeńilgennen keıin sporttyq jolyn aıaqtap, bapkerlik jumyspen aınalysatynyn málimdegen edi.
