Boks: Álem chempıony atanǵan Abylaıhan Júsipov endigi josparyn aıtty

ASTANA. KAZINFORM — Abylaıhan Júsipov mansabynda alǵash ret eresekter arasynda álem chempıony atandy. Ol BAÁ-niń Dýbaı qalasynda ótken álem chempıonatynda top jardy.

Bylǵary qolǵap sheberi sporttyq joly, álem chempıonatyndaǵy jetistigi jáne bolashaqtaǵy josparlarymen bólisti.

— Bul shynymen de kópten kútken altyn medal boldy. Eresekter arasynda áýesqoı bokstan barlyq medaldi jeńip aldym. Tek qana Olımpıada oıyndary men Azııa oıyndarynyń medalderi qaldy, ony aldaǵy jyldary tolyqtyramyn, — dedi Júsipov «Búgin LIVE» baǵdarlamasyna bergen suhbatynda.

Sportshynyń aıtýynsha, bokspen aınalysýǵa ony anasy jetektep aparǵan. Sporttyq mansabyn Qaraǵandy oblysy Abaı qalasyndaǵy sport mektebinde bastaǵan. 

— Kún tártibi oqý men jattyǵýdan quralǵan qatań rejımde ótedi, biraq bos ýaqyttarda kitap oqýdy unatamyn. Hobbıim de sportqa baılanysty. Ústel tennısi, basketbol, shahmat oınaımyn, — dedi álem chempıony.

Júsipov bolashaqta bokstan sport mektebin ashyp, balalardy úıretýdi josparlap otyr. 

Boksshy qarapaıym otbasynan shyqqan, qazirgi tańda otbasyly, eki qyz tárbıelep otyr.

Budan buryn Qazaqstan boks federatsııasy IBA jáne ASBC uıymdaryna narazylyq hat joldaǵanyn jazǵan edik. Onda Abylaıhan Júsipovke Azııa chempıony ataǵy bir kún keshigip jetkeni aıtylǵan.