Boks: Álem chempıonatynyń jeńimpazy A.Júsipovke 270 myń teńge tabys etildi
ASTANA. QazAqparat - Bokstan jastar arasynda álem chempıonatynyń jeńimpazy atanǵan qaraǵandylyq boksshy Abylaıhan Júsipovke 270 myń teńge tabys etildi, dep habarlaıdy Vesti.kz.
Osy somadaǵy sertıfıkat onyń bapkeri Baýyrjan Amanbaevqa da berildi.
Qaraǵandy Boks federatsııasy Júsipov pen Amanbaevtyń eńbegin zor baǵalap, osyndaı syı-syıapat kórsetip otyr. Atalmysh sertıfıkattar búgin Serik Sápıev atyndaǵy boks saraıynda saltanatty jaǵdaıda tabys etildi.
Aıta keteıik, Abylaıhan Júsipov 60 kelige deıingi salmaq dárejesi boıynsha jastar arasynda álem chempıony atandy. Fınalda ol Rýmynııa boksshysy Arsen Mustafany jeńgen bolatyn. Sofııada ótken álem chempıonatynda Qazaqstannyń jastar quramasy eki altyn men eki kúmis medaldan qorjynǵa salyp, dodaǵa qatysqan 90 eldiń ishinen jalpy komandalyq esepte birinshi oryndy aldy.
Taǵy bir atap ótetin jaıt, mamandar Abylaıhan Júsipovtiń boks tehnıkasyn Olımpıada chempıony Serik Sápıevtiń boks mánerine uqsatady.
